Celta-in Benitez an ban

La Liga club talbuai mek Celta Vigo chuan an beisei ang result an neih theih loh hnuin manager Rafael Benitez an ban a, Liverpool boss hlui hian thla kua pawh Spanish club-ah hian hun a hmang hman lo.

Kum 63 mi Benitez hian June 23, 2023 khan Celta Vigo hi a pan a, league match 28 a kaihhruaiah vawi nga chiah hnehna chanpuiin a chhuahsan - La Liga table-ah 17-na an ni mek a, relegation zone an tlansanna zat chu point hnih chiah a ni.

Benitez hian inelna hrang hrangah Celta hi match 33 a kaihruai hman a, vawi kua hnehna a chanpui a, heng zinga match thum chu Copa del Rey lama division hniam zawk team an hneh chu a ni - a match hnuhnung berah a club hlui Real Madrid chu 4-0 ngawtin an ngam lo.

Celta Vigo chuan thuchhuah siamin, "Thla riat zet an theihna zawng zawng hlana RC Celta an enkawl hnuah, beisei ang result kan neih theih chuan loh avangin Rafa Benitez leh a thawhpuite chuan kan club an chhuahsan ta.

"Club chuan Rafa Benitez leh a assistant te chungah, rim taka he club tana hna an thawh avangin lawmthu a sawi a, an hma hun lo kal zel tur atan duhsakna kan hlan bawk a ni," an ti.

Benitez hi a vanglai chuan khawvela coach langsar ber pawl a ni ṭhin a, mahse, chuai lam a pan ve ṭan ta niin a lang. Spanish coach hian Real Madrid B team aṭanga a coaching career ṭanin, Valencia chu hming a chher ṭan tak takna a ni.

Kum 2001-2004 inkar khan Valencia hi enkawlin, La Liga nomawi pahnih a chawipui bakah, UEFA Cup-ah a champion pui bawk a, hemi hnu hian Liverpool a pan. Reds hi Champions League, FA Cup, UEFA Super Cup leh FA Community Shield-ah te nomawi a chawipui a, Champions League final vawi khat dang a hruai thleng bawk.

Inter Milan chu Supercoppa Italiana leh FIFA Club World Cup-ah nomawi a chawipui a, kum 2013 khan Chelsea coach lailawk hna chelhin, Europa League nomawi a chawipui a, Napoli chu Coppa Italia leh Supercoppa Italiana-ah nomawi a chawipui bawk.

Napoli aṭang hian a bul ṭanna Real Madrid-ah lut mah se, season khat pawh daih loin an ban a, kum 2017 khan Newcastle United chu Championship nomawi chawipuiin, Premier League a hruai kai.

Magpies a chhuahsan hnuah Chinese Super League club Dalian Professional, Everton leh Celta Vigo a enkawl a, January 2022 khan Everton pawh hian an ban - a club enkawl hnuhnung pahnihah ban a tawk tihna a ni.