Mumbai-in NorthEast an sawp

Thawhlehni zan Indian Super League inkhelah Mumbai an chak chiang a, an mikhual NorthEast United chu 4-1 in an sawp - Mumbai tan season duhawm tak hmangtu Vikram Pratap Singh bawk a langsar a, hattrick a siam!

Kum 22 mi striker hian minute thumnna aṭangin goal a khung ṭan a, minute 10-naah a belhchhah. Highlander an talbuai zui a, first half hun pek belhah Akash Mishra chuan penalty a hlawh chhuak - Mumbai tan Yoell van Nieff lo pen chhuakin goal-ah a chantir a, 3-0 a ni.

NorthEast United an ṭang hret a, an beidawng duh lo. Minute 79-naah Jithin M.S chuan si phurh a sut ṭhen a, 3-1 a ni. Mahse, minute khat a liam hman awrh tihin Mumbai bawkin goal an khung a, Vikram chuan a hattrick siamna goal leh chak nemnghehna a khung.

Hun pek belhah Highlander forward Parthib Gogoi chu hnawhchhuah zui a ni a, NorthEast United tan thawhleh ngaihna a awm tawh lo. Mumbai an chak a, a tawpa sawi hlawh ber chu Vikram Singh a ni.

Vikram hian 2020-21 season aṭang khan ISL hi a khel ve ṭan a, a season hmasa berah hian match 11 khelin goal khung a nei lo. 2021-22 season-ah match 16 aṭangin goal thum a khung a, mahse, minute 627 bak khelmualah hun a hmang tling lo.

Season hmasa phei kha chuan match 19 khel mah se, minute 313 chiah khelmualah hun a hmang a, goal hnih a khung. Tun season-ah match 18 khelin, goal sarih leh assist vawi hnih a nei ta a, khelmuala a hun hman zat pawh 927 minutes a ni ta - hun pek a nih chuan theihna a nei sang tih a pholang.

Mumbai tan Lalengmawia Ralte leh Lallianzuala Chhangte ten inkhel bul an ṭan a, Vikram-a goal hnuhnung ber hi Lianzuala assist a ni.