Pant-a'n IPL khel thei dawn

India wicketkeeper Rishabh Pant chu lirthei chesual vanga thla 14 chhung cricket a khelh theih loh hnuah tun season Indian Premier League khel turin fitness test a paltlang.

Kum 26 mi Pant hi December 2022 khan lirthei chesualah na takin a inhliam a, hemi hnu hian khelmualah a inlan leh tawh lo. Pant hi Delhi Capitals tan a khel dawn a, a che ṭha a nih phei chuan kumin June thlaa khelh tur T20 World Cup-ah India squad-ah a tel thei ang.

Pant-a inkhelh hnunun ber chu Mirpur-a India-in Test match-a Bangladesh an hneh ṭum a ni a, first inning-ah 93 runs a siam. Roorkee tlangval Pant hian India tan Test match 33 khel tawhin ODI match 30 a khel tawh a, T20 match 66 a khel tawh bawk.

India fast bowler Mohammed Shami erawh kerek hliam vangin India leh England ten Test series an khelh ṭumin a inlan thei lo a, IPL bakah T20 World Cup thlengin a khelh theih a rinawm lo. Chutihrualin England hmachhawn thei lo KL Rahul erawh IPL-ah a rawn let theih a beiseiawm thung.