Quarterfinal-ah Alcaraz a lut

Indian Wells mipa champion lai Carlos Alcaraz chuan nimin zing khan Fabian Marozsan chu straight set hmanga hnehin quarterfinal a inhlangkai - Zirtawpniah Alexander Zverev nen semifinal luh an inchuh leh ang.

Court 1-a inkhelah Spanish tlangval Alcaraz hian darkar khat leh minute 15 chhung lekin 6-3, 6-3 in a hnehna a chang. Inkhel dangah Zverev chuan Alex de Minaur 5-7, 6-2, 6-3 in a hneh ve bawk.

World number 2 Alcaraz hi tun ṭumah hian a champion thei a nih chuan Novak Djokovic (2016) hnua Indian Wells title a kum zawna la leh thei hmasa ber a ni ang, a kum zawna champion thei an awm lohna a rei ta hle a ni.

California thlalera tournament neih laiah hian champion thei tura rinkai zinga mi Stefanos Tsitsipas erawh a chak lo. Greek tlangval hi Jiri Lehecka lakah 6-2, 6-4 in a tlawm.

Czech Republic player Lehecka hian kumin January thla khan Adelaide International nomawi a lo chawi tawh a, atan season ṭha a ni mek. Quarterfinal-ah Jannik Sinner nen an intum leh ang.

Australian Open champion Sinner-a'n last 16 inkhel dangah American mi Ben Shelton chu 7-6 (7-4), 6-1 in a hneh - Italian star tun hnaiah a zawnin match 18 a chak tling ta, kuminah Australian Open bakah Rotterdam Open title a la tawh a ni.