Match 28 chak zawn Al Hilal

Saudi Pro League club Al Hilal chuan world record an siam a, top flight league club zinga chak zawn rei ber record an siam - Thawhlehni zan khan AFC Champions League quarterfinal second leg-ah Al Ittihad chu 2-0 in an hneh a, inelna hrang hranga match 28 a zawna an chakna chiah a ni.

AFC Champions League semifinal lut hlim club hian kum 2016-a Welsh club The New Saints-in record an lo siam tawh, match 27 zet a zawna an chak chu an khum a, an record siam hi uanpui tham a tling.

Al Hilal hian player langsar tak tak an kawl nual a, Chelsea defender hlui Kalidou Koulibaly, Fulham aṭanga an lakluh Aleksandar Mitrović, Sebian midfielder ṭha mi Sergej Milinković-Savić, Wolverhampton Wanderers captain hlui Ruben Neves, Sevilla goalkeeper hlui Yassine Bounou leh Barcelona tana lo khel tawh Malcom te an kawl.

Hei chauh a ni lo - nipui lai khan Paris St-Germain aṭangin Neymar chu euro maktaduai 90-in an lei chhuak bawk a, mahse, Brazilian forward hi khup hliam vangin October aṭang khan a la chawl rih a ni.

Match 28 a zawna an chak nan hian Mitrovic chu player langsar a ni a, hetih chhunga an goal khung 81 zinga goal 26 chu Serbian striker hian a khung - league match 16, domestic cup match thum leh Asian Champions League match kuaah te Al Hilal hi a zawnin an chak.

Benfica leh Brazilian club lar Flamengo boss hlui Jorge Jesus chuan Al Hilal hi a enkawl mek a, Saudi Pro League-ah pawh table chung ber luah mekin, anmahni hnaih bertu, Cristiano Ronaldo khelhna Al Nassr aiin point 12 ngawtin an sang zawk - match 23 an khel tawh a, match sarih bak khelh tur a awm tawh lo.