Wan Bissaka leh Mount ten training an zawm

Manchester United defender Aaron Wan-Bissaka leh midfielder Mason Mount ten team training an zawm a, tun kartawp FA Cup quarterfinal-a Liverpool hmachhawn tur Erik Ten Hag-a hote tan chanchin lawmawm a tling.

Wan Bissaka hi January thlaa Tottenham nen Old Trafford-a 2-2 a an inhnehtawk hnuah a la inlan leh lo. United hian Lisandro Martinez, Luke Shaw leh Tyrell Malacia te erawh an la chhawr thei lo ang.

Left back pahnih Shaw leh Malacia te an inhliam avangin Victor Lindelof chu mual veilamah a khel a, Wan Bissaka hian a bul a ṭan thei a nih chuan vei lam leh ding lama khel thei Diogo Dalot chu mual vei lamah a awm thei ang.

Man United boss Ten Hag chuan Reds hmachhawn tur hian Harry Maguire leh Rasmus Hojlund te pawh an dam hman a beisei thu a sawi. Tun season-ah Man United tan FA Cup chiah hi nomawi chawi beisei theihna a ni a, Ten Hag-a tan season thara a hna chelh chhunzawm turin Jurgen Klopp-a hote hneh hi a pawimawh hle.