Villa mualah Ajax

Aston Villa chuan zanin dar 1:30 hian Ajax an lo mikhual dawn. Europa Conference League last 16 first leg-ah team pahnih te hi 0-0 in an inhnehtawk, zaninah chuan chak an awm ngei ngei a ngai dawn.

Unai Emery-a'n European football-ah tawnhriat a nei ṭha, chutihrualin Ajax hi a club ang tawpa sulhnu nei ṭha an ni ve thung. Jordan Henderson an neih avangin English chanchinbu mite chuan Ajax hi an ngaihven leh zual.

Kar tawp Premier League inkhelah Villa hian Tottenham chu 4-0 ngawtin an ngam lo, midfielder John McGinn hnawhchhuah a nih avangin Spurs lakah an mualpho hle, zanin hi an tan insiamṭhat tum hun tur a ni ang.

Kum 29 mi McGinn hi European football lamah chuan hrem a ni lo, chuvangin midfield laiah Douglas Luiz nen an inkawp ang a, anni pahnih bakah hian Leon Bailey leh Morgan Rogers an awm bawk - Liverpool captain hlui Henderson leh a ṭhiante tan hmachhawn awlsam lo tur khawp an ni.

Ajax pawh an league match lamah an chak zo bik lo, an khingpui Fortuna Sittard nen inhnehtawk hlim an ni. Eredivise lamah pawh pangana an ni mek, season an hman ṭhat loh avangin an tan chuan Europa Conference League lama hnehna chan hi a chakawm zual ang.

Dutch club Ajax muala an inkhelh zawh hnuah Emery chuan, "Kan khel ṭha thawkhat hle, goal khung lo mah ila team nghet tak kan ni tih a lang," a ti. Zanina an inkhelhna tur Villa Park hi an hmangthiam a, tlang turin beisei an nei sang dawn.