PSG-in Dele Alli an duh

Jose Mourinho hnuaia khelhna hmun chang tam lo Tottenham midfielder Dele Alli chu January thlaah French champion PSG-in loan hmanga lakluh an tum dawn.

PSG hian nipui bazarah kum 24 mi Alli hi lakluh an tum tawh a, amaherawhchu Spurs chairman Daniel Levy-a'n a chhuah phal lo.

England international Alli hian tun season Premier League-ah vawi khat chiah bul a ṭan a, October 4-a Manchester United 6-1 a an hneh ṭumin squad-ah a awm lo.

Ningani zana Royal Antwerp an hneh zawhah Portuguese manager Mourinho chuan player zawng zawng a tih hlim theih loh thu a sawi a, Alli tan chhuahna hun ṭha a ni thei ang.

English midfielder Alli hian Spurs tan match 230-ah goal 64 a khung a, assist vawi 56 a siam. Boruak a inthlak danglam viau a nih loh chuan Alli hian London club hi a chhuahsan ngei a rinawm hle.