Mizoram Super League Season 9 : A vawi nga nan Zarkawt BCA an champion
Mizoram Super League Season 9 champion chu Zarkawt BCA an ni. Tualchhung basketball inelna sang leh ngaihhlut berah BCA hian a vawi nga nan nomawi an chawi ta a, record nei ṭha ber niin anmahni hnaih phak an awm lo.
Nilaini zan Finals Game 2 inkehlah Zarkawt BCA hian Khatla TBL chu 89-77 in an hneh a, best of three series chu 2-0 in an la. Coach Marc Lalthlamuana Sailo-in a lo sawi lawk tawh ang ngeiin game 3 khelh ngai loin an chak tlang.
Zarkawt BCA hnaih bertu chu Khatla TBL neiin vawi hnih an champion tawh a, vawi khat champion tawh Mission Veng Vikings an awm bawk - team pathum chauhin MSL title hi an la hlawhchhuak thei a ni.
Final hmuhnawm
R. Dengṭhuama Indoor Stadium, Mualpuiah mipui an pungkhawm hnem a, hall chhunga leng lo pawh an tam. Minute khatna aṭanga second hnuhnung thlengin a hmuhnawm tluan chhuak, tualchhung player-te theihna a sang ta hle.
Damkawr Vanlalṭhazuala hoa inlan Khatla TBL lamin Lalliansanga (LS-a) hmangin basket nei hmasa zauh mah se, game 1 la tawhtu BCA fa chuam Matthew Remtluanga Sailo chuan 3-points hmangin an chhanglet nghal.
Season hmasa TBL champion puitu Ṭhazuala leh MSL9 finals game 1-a player of the game ni thei Zonunsanga ten 3-point an nei zui. Eddie Zaithanmawia basket neih tur Pupua'n a lo dansak (block) lai te chuan hall chunga thawm a ṭha rem rem hle a ni.
Joshua Aaron Keys-a'n a rawn 'dunk' te chu BCA lamin zam phah nan an hmang chuang bik lo, India center Amritpal Singh-a'n Keys tih theih ang a ti let ve thei tho a, a karlakah tualchhung player ten basket an inneih chhawk reng bawk.
A hmuhnawm zel
Quarter hnihna an khel zo a, chawlhlawk laiin BCA lamin 35-33 in hma an hruai, an inthlauhna chu point hnih lek a ni. Quarter thumna laihawlah chuan team pahnihte an intuluktawk zak zak a, game 3 an khelh mai rinna pawh a lian hman.
Mahse, BCA an che fuh leh zawk tlat. Zonunsanga'n 3-points nei lehin 53-47 in an kalfal hret - TBL lamin hnufual hun a ni lo tih hriain time out an ko nghal. Mahse BCA tan Zonuna bawkin point thum nei zui lehin an team a sanfalpui.
Tun season hmang ṭha tak mai Lalnunpuia Renthlei chuan point 18 thawk chhuakin an chakna hnar a ni leh a, hun pawimawh laia point rawn neih leh zauh ṭhin Lalrina Renthlei an la kawl bawk avangin BCA hian an phu ang ngeiin hnehna an chang.
MSL Finals khelh dawn khan Zarkawt BCL player pawimawh Emmanuel Malou chu chhungkaw chhiattawhna avangin an ramah a haw, hming an ziah luh sa Amritpal Singh a lo thleng thung a, ani hian game pahnihah hmun pawimawh changin a team a chakpui.
TBL an chelh
Mizoram Super League season hmasa pahnihah Khatla TBL an champion a, hetih lai hian H. Laldinsanga hoin an khel a, tualchhung basketball inelna sangah sulhnu nei ṭha hmasa leh tournament thununtu an ni bawk.
A hnuah erawh ropui takin Mission Veng Vikings an rawn inlan a, a hnu lehzel erawh Zarkawt BCA chan a ni deuh ngar ngar, a zawnin season li chhung an champion - season hmasa erawh TBL rawn lang lehin a vawi thum nan an champion.
TBL coach H. Lalhruaitluanga'n game 1 aia ṭhain game 2 an khelh ngei a beisei thu Vanglaini a hrilh a, an khel ṭha viau bawk. Mahse, Bungkawn LB Associates nen league match an khelh ṭuma hliam Ṭhazuala chu 100%-in a la dam lo tih a lang a, an tan hna a harsat phah.
Vikings leh TBL champion pui tawhtu Hruaia hian BCA a lawmpui thu leh theihtawpa TBL thlawptute chungah lawmthu a sawi a, season tharah Khatla TBL hian tun aia ṭha zawkin champion an tum leh ngei ang.