Lalrina Renthlei tan nomawi paruk

Mizoram Super League sawi rualin rilruah rawn lang nghal ṭhin a awm, a hming chu Lalrina Renthlei a ni. Tuikhuahtlang star hian tunah chuan MSL nomawi paruk tehmeuh a chawi ta, champion tam ber a ni.

MSL3-ah khan Lalrina Renthlei hian Mission Veng Vikings chu a vawi khat nan a champion pui. Vikings aṭang hian Zarkawt BCA a pan - BCA tan a zawna vawi li a champion hnuah season hmasa khan pahnihna an ni a, kuminah a champion pui leh ta chiah.

Tualchhung basketball inelna lian leh sang ber - MSL Most Valuable Player vawi thum ni tawh Lalrina Renthlei chuan, "Nomawi chawi zinga vawi ruk ka tel thei hi kan lawm, champion ve fo tawh mah ila a hlut dan hi a la pangngai reng.

"Champion leh pawh ka la duh a, hriselna ṭha neiin Pathianin rem a ti a nih chuan hlawhtlinna dang chan leh châkin ka la awm reng," tiin Vanglaini a hrilh a, a khelh mekna Zarkawt BCA chhuahsan tumna a neih loh thu a sawi bawk.

Vikings an champion ṭum khan Lalrina Renthlei hi player pawimawh leh rinrawl a ni daih tawh a, kum ruk a liam hnuah pawh a la ṭha reng. Lalrina chuan MSL tir lam ai chuan MSL9 a thlen meuh chuan tualchhung player ten nasa takin hma an sawn tawh tih a sawi.