Matthew-a tan chawimawina

Basket neih a pawimawh a, chumi rual chiah chuan mahni basket lam venhim ṭhat a pawimawh ṭhin - Zarkawt BCA captain Matthew Remtluanga Sailo (Pupua) chu Mizoram Super League season 9 Defensive Player of the League atan thlan a ni.

Matthew Remtluanga Sailo chuan, "Season hmasa khan final-ah a vanduai zawk kan ni a, kuminah hian champion leh ngei tumin theihtawp kan chhuah. Thlasik chung zawng pawh kha kan chawl lo a, zing hma takin kan training ṭhin.

"Vawi nga kan champion-na a ni a, tum ṭuma nomawi kan chawi hi a la hlu ber hialin ka hria. Player leh coaching staff-te thawhrimna zar a ni, a nihna takah chuan kum dang zawng aiin kan ṭang zawkin ka hria," tiin Vanglaini a hrilh.

Zarkawt star Pupua hian final game 2 bikah chauh pawh, an khingpuite basket neih tur vawi 10 ngawt a dansak. Tualchhung basketball inelna lianah a vawi thum nana Defensive Player of the League atan an thlang hi a mak lo, an veng club hi vawi nga a champion pui ta chiah a ni.