Tetea hun a thleng ta

Tualchhung basketball hrechiangtu a ni a, season hmasa khan Zarkawt BCA tan hian assistant coach niin Marc Lalthlamuana Sailo (Tetea) hi a awm, kuminah a vawi khat nan Mizoram Super League team enkawl hna chu a chungah a tla.

Champion tura an beih dawn sawiin Tetea chuan, "Kan club hi a tirah chuan zing lamah kan training ṭhin, vanṭianah thoin rim takin kan bei a ni. Shooting kan zir nasa a, fitness kan ngaipawimawh em em bawk, chumi tur chuan training kan nei hautak hle.

"Mi ṭhenkhat chuan ka player-te hi ka khelh rei tir mah mah tiin an sawi, mahse ka naute kha minute 40 chhung chawl lo pawha khel turin an fitness a ṭha tawk tih ka chiang, an theihna ka hriat avangin an khelh danah pawh ka buai lo," tiin Vanglaini a hrilh.

Kumin kumtir lam khan Zarkawt BCA hming put chhan Biakchhunga u Ṭhaveli a thi. Tetea chuan, "Kuminah club neitute chhiat an tawk a, chuvangin an tana hlawhtlinna chan ngei hi kan duhzual, kan mamawh engkim min ngaihtuahsaktute an ni," a ti.

Tetea hian tun hmain Mizoram Sub Junior team chu National Championship-ah vawi thum a champion pui tawh, kum 2019, 2022 leh 2023 khan a hlawhtlinpui - MSL bikah erawh head coach ni chunga a champion vawi khatna a ni a, a ngaihlu hle.

Zarkawt BCA coach Tetea chuan, "Hlawhtlinna hi coach leh player-te chauhin an hlawhchhuah a ni lo. Min ṭantu, a bik takin a hmuna inkhel en ṭhintute nena kan hlawhchhuah a ni," a ti. An manager Lalfakawmi chu hmeichhe zingah manager ni chunga MSL champion thei hmasa ber a ni a, a lawmpui thu a sawi bawk.