Mizoram hmeichhe hockey inlan hun a thleng

Hockey India hnuaia inelna Senior Women National Championship 2024 khelh mek a ni a, inelna hmachhawn tur Mizoam team pawh an inpeih tawh - Hockey Mizoram team hian vawiin chawhnu dar 2:00-ah an match hmasa ber atan Himachal an hmachhawn ang.

Inelna hi Major Dhyanchand Hockey Stadium Pimpri, Pune-ah neih niin, team 27 inlante chu pool pariatah ṭhenhran an ni a, an inkhel kual vek hnuah pool tina a sang ber ten quarterfinal an lut chho dawn a ni.

Mizoram coach B. Lalroṭhuami chuan, "Mizoram hockey team hian National Games khelh ve kan chak ṭhin a, kan duhthusam leh suangtuahna pawh a ni. Chumi ti thei tur chuan Senior National hi khelh hmasak a ngai, quarterfinal lut chin hi National Games atan an tling dawn.

"Kan squad hi hmun hran hran aṭanga koh khawm kan ni a, tawnhriat nei ṭha tak tak an awm laiin naupang zawkte an awm bawk. Anni ho nen hian Mizoram tan theihtawp kan chhuah dawn a ni," tiin Vanglaini a hrilh.

Mizoram hi pool F-ah Punjab, Himachal leh Rajasthan te nen an awm khawm. Senior National hi tun hmain Mizoram hian a lo khel ve tawh ṭhin, mahse coach Bte-i chuan tun ṭum hi an inhuho ṭhat ber ṭum a nih a rin thu a sawi a ni.

India tan pawha player langsar Lalremsiami Hmar a awm a, ani bakah hian junior huanga India tana langsar fo tawh Lalrindiki a awm bawk - player dangte pawh kum bithliah lama ram tana feh chhuak tawh an ni fur hlawm.

India junior core goup-a awm lai - F. Lalbiaksiami, Lalthantluangi leh Lalrinpuii te pawh Mizoram tan hian koh an ni a, anni hian tawnhriat tam tak an neih belh ngei ang.

Lalremsiami Hmar chuan, "Mizoram tana khelh ngei mai hi kan lo suangtuah ve ṭhin a, tunah chuan a takin a lo thleng ve dawn ta. National Championship khel tur hian player awm ang ang kan insawmkhawm ve tak meuh meuh.

"Mizoram tan theihtawp kan chhuah dawn - Hockey Mizoram min thlawp ṭhintute chungah kan lawm a, kan ram leh Pathian tan theihtawp kan lo chhuah zel ang," tiin Vanglaini a hrilh.