Vaivakawnin Ramhlun South an barakhaih

Mahindra XUV 300 LPS Cup 2024-ah Vaivakawnin champion lai leh ADFA hnuai inelna record nei ṭha ber Ramhlun South an pet tla. Vaivakawn hi AFC A Licence coach nei Lalruatliana Sailo (Tawia) enkawl a ni a, tun inelnaa 'dark horse' tia chhal theih an ni.

RG Stadium, Mualpuia inkhelah Ramhlun South-in inkhel bul an ṭan ṭha a, minute 11-naah Lalmawizuala'n a tauh lut. Mizoram striker Malsawmfela telna Ramhlun South hi goal khung belh tura ngaih ni mah se rin lawk ang ngawtin thil a thleng lo.

Vaivakawn coach Tawia'n ruahmanna ṭha zawk a, a ruahmanna tihlawhtling turin Lunglei Ramthar aṭanga an lak Lalthanzuala (TZ-a) a ṭangkai bawk. Kumin Santosh Trophy-a Mizoram team tana enthlak zinga mi TZ-a'n minute 35-naah box chhung aṭangin ṭha zetin a pet goal.

TZ-a goal zarah Vaivakawnin beiseina thar an nei a, captain David Lalrinpuia (India international Apuia u) hoin goal venhim hna an thawk ṭha. Hun pangngnaiah goal a luh belh lo a, extra time-ah Ramhlun South tlarhnung tih ṭhat tawk loh vangin TZ-a'n Vaivakawn chakna goal a khung.

Vaivakawn hian NECS Cup 2016 quarterfinal-ah Ramhlun South hi an hneh tawh a, inelna lian thama semifinal an thlen lehna hmasa ber a ni. Kum 2000 khan CYMA Football-ah Vaivakawn hian final an thleng a, Zotlang an hneh lo.

LPS Cup 2024 hi Vaivakawn tan history thar ziahna hun ṭha a ni a, mahse a harsa dawn. Vaivakawn thluak bur coach Tawia-a'n Ramhlun South an hneh ṭum hian red card a hmu a, Kawnpui Jt VC an hmachhawn hunah technical area-ah a ṭhu thei dawn lo.