Inter aia huaisen Atletico

Atletico Madrid-in an mual Metropolitano Stadium-ah tun season Serie A champion tur Inter Milan an lethal a, Champions League last 16 an lut. Diego Simeone hote hi khelmualah 1-0 in an chak lo a, an mualah 2-1 in an chak. Penalty shootout-ah Jan Oblak a che ṭha a, Atletico 3-2 in an vannei ta zawk.

Spanish club-in an mualah nung takin inkhel bul ṭan mah se Italian club-in Federico Dimarco hmangin minute 33-naah an khung hmasa zawk. Dimarco hian box chhunga Nicolo Barella ball pek chu a ti goal.

Mahse, minute hnih hnuah Antoine Griezmann-a'n siphurh a sut a, French forward hi ball-in a zawng zawk a ni ber! Atletico-in extra time thleng turin pawhin goal dang an mamawh a, minute 87-naah Memphis Depay-a'n siphurh a sut - Inter tlarhnung a phui tawk lo.

Atletico-in second leg-ah 2-1 in hnehna an chang a, first leg nen 2-2 a ni chiah. Extra time-ah goal hmuh tur a awm tawh lo. Penalty shootout-ah Inter-in an pet hmasa a, Oblak-a'n Alexis Sanchez leh Davy Klassen te penalty pet a dang. Inter keeper Yann Sommer-a'n Saul pet a dang ve tho. Panganaah Lautaro Martinez a rawn pen chhuak a, a pet over luah avangin Atletico tan pet a ngai tawh lo; Spanish club hi 3-2 in an vannei ta zawk.