James tan contract rei zawk

Chelsea defender Reece James chuan nimin khan kum 2025 nipui thleng daih contract a ziak thar a, player hmabak nei eng tak hi tunah rinrawl la ni chiah lo mah se a lakah Blues hian beiseina an nei sang.

Kum 20 mi James hian nikum September thla khan Carabao Cup-ah a club tana a match hmasa ber a khel a, tun thlengin match 18 a khel hman leh der tawh. November thla khan Ajax nen an inhnehtawk ṭuma a goal khung chu Chelsea player zinga Champions League goal khung thei naupang ber a ni.

English defender James chuan, "Chelsea tan chawlhkar tin mai match khelh theih hi ka duhthusam a ni a, season nga daih contract ka ziak thei pawh hi ka tan chuan duhthusam thleng dik a ni," tiin a sawi. Chelsea hian zanin dar 11:00 hian Premier League khel turin Newcastle an tlawh dawn a, manager Frank Lampard-a naute tan a sang pali zinga tel zel tur chuan point thum hmuh theih a pawimawh ang.