Haaland ka lalut lo ang - Bayern chief

Bayern Munich CEO Karl-Heinz Rummenigge chuan Erling Haaland chu thuneihna a chelh chhungin Allianz Arena-ah a hruai luh loh tur thu a sawi a, amaherawhchu December 2021-a CEO hna a kalsan hnuah erawh engpawh a thlen theih thu a sawi.

Bavarians hian an elpui Borussia Dortmund aṭangin Robert Lewandowski chu kum 2014 khan a thlawnin an lalut tawh a, Polish striker hi khawvela player ṭha ber zinga mi ni mekin season liam taa treble champion-na turah pawh player pawimawh a ni.

Rummenigge chuan, "Borussia Dortmund CEO Hans-Joachim Watzke nen tun hnaiah kan boruak a ṭha a, transfer chungchang pawh inremna kan siam fo a ni. Amaherawhchu thuneihna ka chelh chhung chu Lewandowski anga transfer lian chu a thleng lo ang," tiin a sawi a, Erling Haaland an lakluh rih loh tur thu a sawi.

Bayern Munich CEO chuan sawi chhunzawmin, "Haaland hi Dortmund-ah a ṭangkai a, keini lamin Lewandowski kan neih avangin Haaland hi kan mamawh rih lo. Chutihrualin ka awm loh hnu chu ka sawi lawk thei lo, December 2021-ah ka hun a zo dawn," tiin Norwegian striker Haaland chu a awm loh hnuah an la lakluh theih tho thu a sawi.

Germany football thununtu Bavarians hian an mit it zawng an hlah lo a, player ṭha apiang an lak theih avangin Bundesliga-ah el pha an awm lo a ni ber. Zanin dar 11:00 hian Hansi Flick-a hote hian Union Berlin an hmachhawn ang.