LPS Cup Semifinal thawh khatna Bethlehem Vengthlang vs Sihphir Venghlun

15th March, 2024

Mahindra XUV 300 LPS Cup 2024 semifinal hmasa zawk chu zanin dar 8:00 hian Bethlehem Vengthlang leh Sihphir Venghlun ten an khel dawn. Semifinal hi double leg-a khelh tur a ni a, second leg hi March 18, Thawhṭanni zan dar 8:00-ah an khel leh ang.

Semifinal pakhat zawkah Vaivakawn leh Kawnpui Jt te an inhmachhawn dawn a, semifinalist zingah BVT chauh hi khua/veng inelna lian thama champion tawh an ni. BVT hi 2016 NECS Cup champion an ni a, kuminah nomawi chawi leh ngei an tum.

Team ṭha 2

LPS Cup inkhelh hun laiin ISL, I League, Santosh Trophy leh inelna dang a awm avangin player ṭha inlan thei lo an tam. Tualchhung football hrechiang chin chuan ADFA First Division-a club ṭha nei veng BVT leh Sihphir Venghlun hi team ṭha zingah an dah hrim hrim.

First Division-ah BVT leh Sihphir Venghlun hi 1-1 in an inhnehtawk. Sihphir Venghlun hian game mawi an khel a, khelmuala huaisen BVT hi league round-a pakhatna an ni thung. Chutihrualin First Division-a an team leh tuna an team erawh a danglam hret tih hriat a ṭha.

Semifinal kalkawng

Sihphir Venghlunin match hmasa berah Phulpui 5-0 in an sawp nghal a; goal khungtu zingah an player pawimawh Ricky Lalramnghaka (Selesih) leh Joseph Lalṭhafela (Neihbawi) te an tel. Hemi zawh hian Lengpui lakah fiahna hautak an hmachhawn a, hun pangngaiah goal lut lo mah se penalty shootout-ah an vannei zawk.

Sihphir Venghlun hian inkhelh thiam veng Republic Veng 3-2 in an hneh leh a, sawm bik zinga mi Thenzawl Joint chu 4-0 zetin an sawp. Thenzawl laka hattrick siamtu Ricky-a'n tun inelnaah goal ruk a hung tawh. BVT tan pawh ven uluk a ṭha ang.

Bethlehem Vengthlang hi Lalrammawia'n a la ho thei a; match hmasa berah Samlukhai 6-0 in an sawp. Second round-ah BVT-in Edenthar 2-0 in an hneh a, last 16 leh quarterfinal-ah team ṭha Chhinga Veng leh Sialhawk hmachhawnin penalty shootout hmangin an hneh ve ve.

BVT hian match li an khelh tawhah goal an la chhuah lo. Sihphir Venghlun an hneh theih nan tawnhriat nei ṭha Rammawia, Hmingthanmawia leh Lalruatkima (RK-a) te bakah reinforce player Malsawmsanga (goalkeeper), Remlalfaka (defender) leh Ruata Tlangte (midfielder) te an chet ṭhat a pawimawh dawn a ni.