Dortmund tan Sancho a vul

Borussia Dortmund-in PSV Eindhoven hnehin kum thum hnuah Champions League quarterfinal an lut. Dortmund quarterfinal thlenpuitu chu Manchester United duh loh Jadon Sancho a ni.

Signal Iduna Park-ah Dortmund-in nung takin bul an ṭan a, minute thumna lekah Sancho-a'n box pawn aṭangin goal kilah a pet lut. First leg-ah team pahnih hi 1-1 in an inhnehtawk a, Dortmund tan goal khat thun belh hi a tawk.

Amaherawhchu inkhelh hun a la tam avangin Dormtund-in nuam sa takin hnehna an chang lo. PSV substitute Hirving Lozano-a'n goal ban a pet per a, Johan Bakayoko pawhin Dortmund keeper Gregor Kobel hna a siamsak.

Dortmund-in minute 77-naah Niclas Füllkrug hmangin an khung belhah an inngai a, mahse offside vangin pawm a ni lo. Mualneitu tan hun tawp lam harsat phah mah se injury time-ah captain Marco Reus-a'n PSV defender tihsual remchanga lain chak ngemnghehna goal a khung.