AIFF AGM: Eirua puh President an chhan

March 10, Pathianni khan All India Football Federation chuan Executive Committee leh Annual General Body Meeting (AGM) chu Itanagar, Arunachal Pradesh-ah an nei a, Indian football nghawng thei tur thil tam tak an rel.

Chung zinga langsar tak pakhat chu tun hnaia beih tawk nasa tak AIFF president Kalyan Chaubey thlavang an hauh chu a ni a, mahse, a vanglaia goalkeeper ṭhin Chaubey beitute hi an thusawiah an ding nghet ve tlat - AIFF hian thutlukna a siam sual leh sual loh chu a la hriat thuai ang.

Indian football sawi danglam dawrh thei thil pakhat an sawi chu video assistant referee (VAR) a ni. VAR chungchang hi tun hma pawhin sawi a lo ni fo tawh ṭhin a, a tak takah eng ang chiaha hautak nge a nih ang sawi thiam a harsa.

AIFF AGM hi chuan AIFF tana sum sen ngai loa tih theih dan a awm niin an sawi a, AIFF thawhpui, ISL lam enkawltu Football Sports Development Limited (FSDL) kutah thui tak an innghat dawn tihna a ni.

President puhna

AIFF hian March 3, Pathianni khan an principal legal advisor Nilanjan Bhattacharjee chu a hna aṭanga an ban thu hriattirna lehkha an pe a, Bhattacharjee an ban chhan hi AIFF president Kalyan Chaubey chu dik lo taka pawl sum hmanga a puh vang a ni.

Bhattacharjee hian India prime minister Narendra Modi hnenah lehkha thawnin, he lehkha hi home minister Amit Shah leh sports minister Anurag Thakur te pek tel an ni bawk a, AIFF dan lam hotupa hlui hian Chaubey chu uchuak taka a ṭhian hnaite duhsakah a puh.

Nilanjan Bhattacharjee chuan, "Chaubey hian midang kaltlangin, ama thurawn angin I League (2022-23), IWL leh Santosh Trophy broadcasting rights chu company pakhat a pe a, futsal leh tournament dang thlengin a duhsak hle," a ti!

AIFF Legal Head hlui chuan, "A zin veivahna leh hotel thlen man ringawtah vaibelchhe tel sum a seng a, Bangalore a zinna atan ringawt pawh nuai 40 chuang a hmang a ni," a ti a, AIFF President chu a puh chhe hle.

A chhan letna

September 2022-a AIFF hotupa atana thlan tlin a nih khan Chaubey hian Nilanjan hi Legal Head turin a ruat a, mahse, tunah chuan inhmu thiam loin an inṭhen ta. Nilanjan chuan, "Banna lehkha hi chu dawng turin ka lo inringsa a ni," a ti.

Nilanjan chauh hi tun hnaia AIFF hruaitu lawk ban a ni lo. Chaubey-a'n President dinhmun a luah ruala Secretary General tura a lakluh Dr. Shaji Prabhakaran chu November 8 khan a hna aṭangin a lo ban tawh bawk a, hei hi Chaubey nena an inhmuh thiam loh vang tho a ni.

Dr. Shaji ban a nih tirh hian Vanglaini chuan FIFA South Central Asia development officer hi a be pawp nghal a, hetihlai hian Shaji erawhin, "Nakinah chiang zawkin engkim ka la sawi ang," tih bakin a chhang lo.

Vanglaini nen an inbiak hnu lawkah Dr. Shaji chuan, "Team angin kan thawk ho a, dan bawhchhiat nei anga min puhna phei chu dawt a ni," tiin X-ah a ziak a, AIFF executive committee member zawng zawng hnenah email thawnin, "Executive Committe thu loa ban ka ni hi AIFF Constitution kalh tlat a ni," a ti bawk.

An ṭang na!

Dr. Shaji a reh zui a, tun hnaiah Nilanjan-a'n boruak a nei leh a, Chaubey a ngawi lo. AIFF President chuan, "Nilanjan-a'n min tihmingchhiat a tum tih chiang takin a lang a, dan angin hma kan la a, legal notice kan pe tawh," a ti a, an puhna a pha nasa hle.

Chaubey chuan, "Itanagar-ah AGM kan nei dawn a, he hunah hian kan internal auditor Deloitte-te chu tel turin ka sawm hial a ni," a ti a, he thu buatsaih a nih lai hian AGM-ah Deloitte te hi an tel leh tel loh hriat a ni lo.

AIFF President chuan broadcasting rights dik lo taka tia puh a nihna chu chhangin, " Bhattacharjee hi tender selection committee-ah pawh a tel a, khatihlai khan engmah a sawi lo," a ti a, "I League production company hi AIFF leh FSDL (AIFF marketing partner) te nen sawi ho a nih hnuah kan thlang chauh," a ti bawk.

Chaubey chuan a mimal thil atana vaibelchhe tel hmang anga puhna chu chhangin, "AIFF President ka nihna angin ka zin apianga business class-a zin thei ka nih laiin economy class hlir deuhthawin ka zin a, suite room-a thleng thei ka nih laiin standard room ka hmang a, ka daily allowance pawh Rs. 10,000 a nih laiin cheng khat pawh ka la lo," a ti a, a ṭang na hle.

An chhan tlat

AIFF President hi AGM chuan chhanin, "A mimal taka AIFF President beihna a ni mai lo a, mahse, AIFF leh a member zawng zawng beihna a ni tel a ni," an ti a, Nilanjan-a thu leh hla chu intihhmingchhiat tumna mai a nih thu an sawi bawk.

Indian football hotuten an tih tur tak tiin AIFF President an chhan a, hetihrual hian an puhna hi dawt nge thutak a nih, tihah erawh chiang taka sawi theih a la awm lo - Nilanjan hi a ṭang na ve tlat!

AIFF AGM ṭhutkhawm hma hian Nilanjan hian Chaubey hi amah tihhmingchhiat tumah puh letin, hriattirna lehkha a pe tawh a, AIFF Legal Head a nihna aṭanga bang turin na takin a nawr lui niin a sawi bawk.

Hei mai a ni lo - dan hremi, hriat hlawh ve tak Nilanjan Bhattacharjee chuan a dinna ngaiah a din reng thu sawiin, Chaubey hmaah a zam lo. A la ngaihnawm dawn chauh niin a lang!