Sociedad-in Tierney an ngam lo

La Liga club Real Sociedad chuan Arsenal aṭanga loan-a an hawh mek Kieran Tierney khelh danah lawm viau mah se, a man a tam tham deuh avangin an lei ngam dawn lo nia a sawi a ni a, Gunners-ah bawk a kir leh dawn niin a lang.

Spanish media ṭhenkhatin an tarlan dan chuan Arsenal hian Tierney manah euro maktaduai 23 tal hmuh an inbeisei dawn a, hei hi Sociedad tan chuan a sang lutuk hret - an lei ngam lo.

Tierney hian Sociedad a pan hnuah inelna hrang hrangah match 19 a khel tawh a, heng zinga 14-ah hian bul a ṭan. Spanish club hi a khelh danah lawm thawkhat mah se, rinrawl bera an neih ni lem lo full back lei nana €23mtd sen hi an hreh niin a lang.

Real Sociedad hian zanin dar 1:30-ah league match khel turin Cadiz an mikhual dawn a, table-ah parukna dinhmun luah mekin, an tan Champions League beiseiawm tawh lo mah se, parukna tan Europa Conference League playoff khelh tur a la ni a, inthlahdah a thiang lo.

Sociedad hian match 28 khelh tawhah point 43 an nei mek a, an hnuai chiaha awm Real Betis-in point 42 an neih ve bawk avangin vawi khat chetsual a pawi thui thei.