Maurizio Sarri a bang

Lazio manager Maurizio Sarri chuan a hna aṭanga banna a thehlut a, Italian coach hian inelna hrang hranga an match hnuhnung parukah vawi nga ngawt a team hi a tlawmpui avangin Lazio enkawl chhunzawm zel theiah a inngai tawh lo.

Lazio hian Thawhṭanni zan khan league match-ah Udinese chu 2-1 in an hneh lo a, Serie A-ah table-ah pakuana an ni a, season thara European football khel phak chin an phak lohna chu point sarih ngawt a ni mek.

Kum 65 mi Sarri hian kum 2021 khan Lazio hi a zawm a, season hmasa khan Serie A-ah pahnihna dinhmun hial luahpuiin, kum 2000-a league nomawi an chawi hnua season an khar ṭhat ber a ni hial.

Beiseina sang tak nen season thar an hmachhawn a, mahse, an beisei ang result an nei thei ta lo. Sarri-a'n banna a thehlut a, assistant manager Giovanni Martusciello chuan Lazio boss dinhmun a luah lailawk ang.

Inrinni zan dar 1:15-ah Lazio hian league match khel turin Frosinone an lenchilh zui dawn a, thla thar hian Coppa Italia semifinal khel turin Juventus an hmachhawn dawn bawk.

Sarri hian tun hma chuan club tenau deuh hlir a enkawl ṭhin a, mhase, June 2015 - May 2018 inkar kha Napoli enkawlin, nomawi em chawipui lo mah se, season thum a enkawl chhung hian vawi hnih ngawt Serie A-ah pahnihna a nihpui.

Napoli chhuahsanin Chelsea a zawm zui a, season khat lek cham mah se Europa League-a nomawi a chawipui bakah, League Cup final a hruai thleng bawk.

2016-17 season-a Serie A Coach of the Year dinhmun pawh lo luah tawh coach hian Chelsea a chhuahsan kumah vek Juventus a zawm zui a, Serie A nomawi chawipuiin, Coppa Italia-ah final hruai thleng bawk mah se nomawi erawh a chawi lo. Champions League-ah round of 16 an paltlang thei lo bawk a, season khat hnuah ban a ni.