Mumbai umtu Mohun Bagan an chak

Indian Super League-ah Mohun Bagan chuan Jawaharlal Nehru Stadium, Kochi-ah mualneitu Kerala Blaster chu 4-3 inan hneh. Bagan hian point thum hlu tak an hlawhchhuah avangin point 39 an hmu a, match khata khel tlem chungin pakhatna Mumbai City nen an point hmuh zat a inang.

March 13, Nilaini zan inkhelah hian goal sarih ngawt a lut. Bagan-in minute lina lekah Albanian striker Armando Sadiku hmangin goal an khung nghal a; Blasters defender Pritam Kotal-a'n a hna a thawk tawk lo.

Inkhel a nung ṭha a, goal chance tam mah se first half-ah goal a luh belh lo. Minute 54-naah khawtual tlangval Vibin Mohanan-a'n box pawn aṭangin mawi zetin siphurh sutna goal a khung.

Mahse, minute thum hnuah Bagan-in siphurh an sut a; Sadiku-a'n box chhungah ball la thlain kawh zetin a pet goal. Bagan-in 2-1 in hma hruai a, mahse Blasters-in Dimitrios Diamantakos hmangin minute 63-naah siphurh an sut.

Goal venhim kawngah Kerala an fimkhur tawk lo a, minute 68-naah Deepak Tangri-a'n corner aṭanga ball kal a tauh lut. Bagan bawkin hma an hruai a, khung belhna remchang pawh an nei ṭha. Jason Cummings-a'n goal-a Bagan player chauh awm hnuah a khung lo.

Injury time-ah Cummings-a'n goal a khung ta tho a, Bagan-in 4-2 in hma an hruai. Mahse, Blasters-in captain Diamantakos hmangin siphurh an sut ṭhen leh a, goal dang khung belh lehna hun erawh a awm tawh lo. Kolkata club 4-3 in an chak. International break a awm dawn avangin March 30, Inrinniah ISL chhunzawm leh chauh tur a ni.