Pathianni zanah Man United Vs Liverpool
FA Cup quarterfinal-ah Premier League club lian panga Manchester City, Manchester United, Liverpool, Chelsea leh Newcastle United te an la dam a, tunkar tawpah inkhel hmuhnawm bik en tur a awm dawn. March 17, Pathianni zan dar 9:00-ah Man United leh an hmelma Liverpool inhmachhawn tur hi inkhel tur pali zinga en châkawm ber a ni.
Chutihrualin zanin dar 11:00-a Man City leh Newcastle inkhel tur pawh a enktlak dawn. Pathianni zan dar 6:15-ah Chelsea leh Leicester City an inkhel dawn a, Foxes hi Premier League club ni lo mah se Championship-a pakhatna dinhmun hauhtu an ni. Zanin dar 5:45-ah Wolves leh Coventry te an inkhel bawk ang.
Reds vul lai
Hliam vanga buai tur an awm a nih chuan Liverpool aia buai tur chuang an awm lo. Jurgen Klopp-a hote hian tun dinhmunah pawh player 10 ngawt hliam an la nei a, an player pawimawh an ni hlawm.
Manchester United lakah hian Alisson Becker, Diogo Jota, Trent Alexander-Arnold, Joel Matip, Curtis Jones, Ryan Gravenberch, Stefan Bajcetic, Ibrahima Konate leh Thiago Alcantara te an la chhawr thei dawn lo.
Mahse, Klopp-a hote hi kim lo chungin an tal ngap hle. Europa League quarterfinal lut turin Sparta Prague chu Ningani zan khan Anfield-ah 6-1 in an sawp. Darwin Nunez, Bobby Clark, Mohamed Salah, Cody Gakpo leh Dominik Szoboszlai ten goal an khung. First leg-a 5-1 a an chakna nen phei chuan 11-2 ngawtin hnehna an chang.
Sparta Prague hi an nem hran lo, Europa League last 16 lut turin European football aṭanga Man United pet tlattu Galatasary an hneh tlat. Hei bakah hian Liverpool hi an ṭha hrim hrim tih nemnghettu chu Manchester City laka an khelh dan aṭangin a ni.
Anfield-ah Reds kim lo leh Man City 1-1 in an inhnehtawk a, Klopp-a hote hi chak phu khawpin an khel ṭha. Man United lakah hian Liverpool hi an kim dawn lo a, chutichung chuan chak tura rinkai zawk an ni. Reds kim lo hian League Cup final-ah pawh Chelsea an hneh tawh a, FA Cup quarterfinal-ah pawh inrinrintawkna nen Old Trafford-ah an lenglut ang.
Beiseina chu
Liverpool-in hliam an ngah a, Man United pawhin hliam an ngah ve tho. Team pahnih inan lohna erawh inhliam chunga Liverpool an chet ṭhat laiin Erik Ten Hag-a hote erawh an chefuh hleithei lo thung. Chutihrualin Man United-in Man City an ngam loh hnuah an mualah Liverpool khaw club tho Everton an hneh tawh a, an hmelma Liverpool nen an inkhelh hun atan inrintawkna an neih phah ang.
Man United player inhliam te an dam ṭan a; Aaron Wan-Bissaka leh Harry Maguire bakah Rasmus Hojlund te chhawr theih dan a awm maithei. Player inhliam te hi an dam emaw dam lo emaw pawh ni se Alejandro Garnacho leh Marcus Rashford ten hmun pawimawh an chang.
Mahni muala khel tur ni mah se Ten Hag-a'n chak duhin goal venhim a ngaih pawimawh a rinawm a, Garnacho leh Rashford te tlan chakna hmangin counter attack aṭanga an nawr a rinawm. Tun season-ah club pahnih hi Anfield-ah an inkhel tawh a, goal awm loin an inhnehtawk.
FA Cup-ah hian fifth round aṭangin replay a awm tawh lo a, minute 90 chhunga an inhnehtawk a nih chuan extra time khelh a ni ang a, an la inhnehtawk cheu chuan penalty shootout hmangin chak zawk zawn a ni dawn. Hei hian tunkar tawp FA Cup quarterfinal pawh a tihmuhnawm sawt ang.