Kawnpui leh Vaivakawn tan hun pawimawh

Mahindra XUV 300 LPS Cup 2024 semifinal first leg-ah zanin dar 8:00 hian RG Stadium-ah Kawnpui Joint VC leh Vaivakawn te an inkhel dawn. Second leg hi March 19, Thawhlehnia khelh leh tur a ni. Nizan khan Bethlehem Vengthlang leh Sihphir Venghlun ten semifinal hmasa zawk first leg an khel a, result kan hre hman lo.

Kawnpui Jt leh Vaivakawn te hian football inelna lian thamah nomawi an la chawi loh avangin tun ṭum inelna hi an tan a pawimawh hle. Player neih dan thlirin Kawnpui hi buk rit zawk an ni a, Kawnpui khua ang tawpa rawn khel an nih bakah reinforce player an nei ṭha a, coach tawnhriat nei ṭha K. Malsawmkima'n a enkawl bawk.

Chutihrualin Vaivakawn hi coach Lalruatliana (Tawia) enkawl an ni a, 2000 CYMA Football hnuah a vawi khat nan inelna lian thamah final thlen an tum. Mahse, Tawia hi hrem vangin technical area-ah a ṭhu thei dawn lo a, hei hian result-ah a nghawng lian tak a nei thei thung.