Emirates Stadium-ah Kane a kir dawn

UEFA Champions League quarterfinal draw chu nimin kha Nyon Switzerland-ah neih a ni a, team pariat la damte an ṭha bawka inkhel tur pawh en a châkawmawm hlawm hle. Harry Kane pawh London-ah a kir dawn a, Bayern Munich jersey ha chungin Arsenal a hmachhawn dawn.

Nikum semifinal-a inhmachhawn Manchester City leh Real Madrid te an inkhel dawn a, Carlo Ancelotti hoten phuba lak an tum ang. City leh Real inkhela chak zawk hian Bayern leh Arsenal inkhela chak zawk an hmachhawn dawn.

Quarterfinal inkhel dangah Paris St-Germain leh Barcelona bakah Atletico Madrid leh Borussia Dortmund te an inkhel dawn bawk. Luis Enrique-a'n a club hlui Barca a hmachhawn dawn a, Lionel Messi club hlui pahnih inkhel tur hian ngaihven hlawh hle.

UCL quarterfinal first leg hi April 9-10, 2024-a khelh tur a ni a, second leg hi April 16-17, 2024-a khelh leh tur a ni. Semifinal first leg hi 30 April leh 1 May, 2024-a khelh tur a ni a, May 7-8, 2024-ah second leg khelh leh a ni ang.

Final hi Wembley Stadium-a khelh tur a ni a; June 1, Inrinnia khelh tur a ni dawn. English club aṭangin Manchester City leh Arsenal te an la dam a, semifinal-ah an inhmachhawn theih avangin final-ah English club pahnih hmuh theih a ni dawn lo.