Gokulam lakah Aizawl FC an vanduai

Nilaini zan I League inkhelah Aizawl FC-in mualneitu Gokulam Kerala 4-3 in an hneh lo. B. Malsawmzuala kaihhruai Mizo team hi point hmuh khawpin khel ṭha mah se an vanneih zan a ni lo a; EMS Stadium, Kozhikode-ah point an hlawh chhuak lo.

Goal sarih tehmeuh luhna inkhelah Mizo club-in goal an khung hmasa zawk. Champhai Zotlang tlangval Lalbiakdika'n box chhungah rilru fim puin minute 20-naah goal hmahruai a khung. Mahse, Gokulam-in chak tumin na takin an nawr let a, an goal chhuah da takah erawh AFC tlarhnung an inthlahdah hret.

Minute 29-naah Matija Babovic hmangin Gokulamin siphurh an sut a, Mizo club player-te tih hram hram loh vang a ni ber. AFC harsatna belhchhah turin Nikola Stojanovic-a'n angle zim tak aṭangin minute 43-naah kawh zetin a pet goal - goalkeeper Nora Fernandes-a'n a hna a titawk lo.

Mizo club-in first half an khar ṭha tho a, minute 45-naah Tharpuia cross ball ṭha chu Gokulam defender Akhil Praveen-a'n an lamah a tilut a, first half-ah 2-2 a ni.

Second half-ah Kerala-in bul an ṭan ṭha a, keeper Nora Fernandes tan hna an siam nghal. Minute 64-naah Babovic-a'n box pawnah hun thawl a nei a, duh thala an insiamremin box chhungah ball khalh lutin goal kilah a pet lut.

Gokulam-in foreign player an neih ṭhat rah an seng a, Spanish midfielder Jonathan Viera Otero-a'n box pawn aṭangin minute 70-naah mawi zetin a pet goal leh bawk.

Kerala club-in 4-2 a hma an hruai hnuah Mizo club an beidawng lo a, minute 84-naah MPL10 best forward leh top scorer Lalrinzuala'n siphurh a sut ṭhen. Serchhip tlangval Rinzuala hian tun season I League-ah goal 11 a khung tawh.

Mizo club hian hun tawp lamah na takin an nawr chhunzawm a, Gokulam-in goal venhim hna an thawk thung. Lamzawl tlangval R. Lalthanmawia'n (Amawia) siphurh sutna hun remchagn a nei a, mah se a vanneih ṭum a ni lo - goal ban a pet per.

Aizawl FC-in kuminah chak hmel an la hmu lo a; March 18, Thawhṭanni hian Inter Kashi an hmachhawn ang. Vawiin tlai dar 3:30 hian I League-ah Namdhari leh Shillong Lajong te an inkhel dawn. March 17, Pathianni inkhel pathum a awm dawn. Chawhnu dar 2:00-ah Real Kashmir leh Delhi F, tlai dar 4:30-ah Neroca leh Mohammedan SC bakah zan dar 7:00-ah Gokulam leh Sreenidi Deccan te an inkhel ang.