Zverev hnehin Alcaraz a tlang

Indian Wells champion lai Carlos Alcaraz chuan Alexander Zverev hnehin semifinal a lut, final thleng tur chuan Jannik Sinner a paltlang leh phawt a ngai dawn - player pahnih hian world number 2 dinhmun an inchuh tel nghal ang.

Ningani zan inkhelah Alcaraz hian darkar khat leh minute 48 chhung lekin Zverev hi 6-3, 6-1 in a hneh a, set hnih an khelh chhung hian German tlangval lakah harsatna lian tham a tawk lo.

Inkhelh laklawh laiin camera pakhat chu khuai (bee) ten an bawm a, hei vang hian an chawl lailawk. Spanish star Alcaraz chuan, "Thil thleng khat tak a ni ang, kei chuan ka tawn vawi khatna a ni hial.

"Court kan chhuahsan a, TV aṭangin khuai kha kan en - a boruak kha a nuam dangdai phian mai," tiin a sawi. Khuai hian Alcaraz pawh hi an bawm hman a, mahse harsatna thleng loin an chingfel thei a ni.

Inkhel dangah Jannik Sinner chuan Jiri Lehecka chu 6-3, 6-3 in a hneh. Sinner tan semifinal a khelh chhunzawm tur hi a pawimawh dawn, final luh a duh dawn bakah a chak a nih chuan world number 2 nih theihna remchang a nei dawn.

Kum 22 mi Sinner chuan, "Thli a thawt nasat avangin set hmasa zawk tir lam kha chu a harsa ve khawp mai. Season hmasa khan he hmunah hian semifinal ka lo thleng tawh bawk, kumina ka chhunzawm thei hi ka lawm takzet a ni," tiin a sawi.

Sinner hian semifinal-ah Alcaraz a hneh a nih chuan, Italian mipa zingah kum 1973 hnua tennis world number 2 ni leh thei hmasa ber a ni dawn, a chak lo zawk chu number 3 an ni ang - a chung berah chuan Novak Djokovic a la awm chhunzawm dawn.