Mbappe tan Real-ah Ballon d'Or a hnai - Ronaldo
Mi tam takin, "The original Ronaldo" an tih deuh kher, Brazilian striker ropui Ronaldo chuan Kylian Mbappe chungchang a sawi chhuak a, French striker chuan a club hlui Real Madrid a pan a nih chuan a tan Ballon d'Or a hnaih sawt tur thu a sawi.
Paris Saint-Germain forward hian season tawp rualin French club hi a chhuahsan tur thu a tichiang tawh a, khawthlang media-te chuan Real Madrid zawm turin an inbe rem vek tawh ang hialin an tarlang.
Ronaldo chuan, "Official taka an puanzar hma chu lo nghak phawt ila, mahse, Kylian Mbappe-a'n Real a zawm tur anga sawi hi chu kan phur phah em em vek a ni. Player thiam bik a ni a, khawvela ṭha ber pawl a la ni dawn.
"Madrid hi a zawm a nih chuan a tan thutlukna dik a ni ang. Real hi a zawm a nih ngat chuan Ballon d'Or hi a dawn ngei ka ring a ni," a ti a, French striker chungah rinna a nghat lian hle.
Ballon d'Or vawi hnih lo dawng tawh Ronaldo chuan, "Madrid-ah chuan a thutlukna apianga amah thlawp tur a nei dawn. Khelmuala amah thlawp tur team ṭha tak a nei ang a, khelmual pawnah pawh chutiang tho chu a ni ang. Real-ah hian an duat em em dawn tih ka chiang.
"PSG pawhin chelh ngei an duh a, theihtawp pawh an chhuah. An hmachhawp atana player langsar a ni tlat alawm. Mahse, Madrid a zawm huna a che tla hi hmuh châkawm ka ti - thil chiang tak chu Madrid a pan a nih chuan, hmuhnawm ti lehzualin Mbappe hi kan thlir thei ang," a ti.
La Liga hmahruaitu Real hian tunah pawh player naupang leh langsar tak tak an kawl nual. Borussia Dortmund aṭanga an lakluh Jude Bellingham chu Real-ah hian a vul mek a, ani bakah hian Vinicius Junior leh Rodrygo te an la awm cheu bawk.
Mbappe tan a chawi châk em em Champions League nomawi a hnai sawt dawn, tia sawi theih pawh a ni - Real-in European football-a club inelna sang ber an ngamzia chu kan hriat sa a nih kha!
Kum 25 mi Mbappe hian World Cup nomawi hial chawi tawhin, final phei chu vawi hnih ngawt khel mah se, Ligue 1 lama khel a nih miau avangin Ballon d'Or a la dawng lo a, Ronaldo sawi ang hian Madrid a pan a, hlawhtlinna a chhar a nih ngat chuan a tan Ballon d'Or dawn hi a harsa lo ang.
Real hi tun season-ah pawh nomawi lian pahnih chawi thei dinhmunah an ding mek. La Liga-ah hmahruaitu niin, anmahni hnaih bertu Girona aiin point sarih ngawtin an sang fal mek a, pathumna Barcelona aiin point riatin an hmu tam zawk.
Carlo Ancelotti naute hian Champions League quarterfinal an lut fel tawh bawk a, league leh European football-a club inelna sang berah nomawi chawi turin beiseina sang tak an nei mek.
Real hian zanin dar 8:45-ah league match an khel dawn a, Osasuna an mikhual dawn. Hetihlai hian an hmelma kumhlun Barcelona leh Atletico Madrid an inkhel dawn bawk a, hei hi mipui tam zawk mit fukna tur a ni ang.
Pathianni zan dar 1:30-ah Atletico Madrid khelmualah Barca hi an lenglut dawn a, Real thlahfal lutuk an duh loh a, an champion nomawi humhim an duh a nih chuan hmelma khelmualah an tlawm a thiang tawh lo.
La Liga table-a palina ni mek Atletico tan league nomawi beisei ngam chi a ni tawh lo a, point 14 ngawtin Real an phak lo. Chutihrual chuan season thara Champions League khelh tum an ni a, anni aia point hnih chiaha hmu tlem Athletic Bilbao-in top four an beisei ve avangin inthlahdah a thiang bik lo ang.