A tawpah Leverkusen an tlang

Minute 90 an khelh tlin chuan Bayer Leverkusen chu Qarabag lakah 2-1 in an hniam zawk - Xabi Alonso naute hi Europa League last 16 aṭanga tla tur an ni, inkhel a tawp meuh chuan Bundesliga club hi a chak zawkah an ṭang leh ta daih.

Bayer Leverkusen tan forward Patrik Schick-a'n minute 90+3-ah si phurh a sut zo a, 2-2 a ni chiah - hamrik hnuhnung ber a rik hma chiahin Czech Republic international hian 3-2 a chakna goal a khung; inkhel pahnih belhkhawmah 5-4 in hnehna an chang ta zawk a ni.

Tun season inelna hrang hrangah Alonso naute hi match 37 chhung tlawm loin an kaltluang ta. Bundesliga lamah hma an hruai mek bawk - German football inelna sang ber bakah Europa League champion ni kawp thei dinhmunah an ding mek.

Goal pawimawh pahnih khungtu Patrik Schick chuan, "Thil mak lo thleng a ni ngawt lo, kan team hi chuan a tawp thlengin kan bei ṭhin, chumi rah chhuah chu tum ṭumah hian kan hmu leh a ni," tiin an thawhrim rah a ni tih a sawi.

Inkhel dangah AC Milan chuan Slavia Prague 3-1 a hnehin, inkhel pahnih belhkhawmah 7-3 in an tlang. Premier League club Brighton chuan an mikhual AS Roma 1-0 in hneh mah se, khualmualah an tlawm tawh avangin 4-1 in an chak lo.