AIFF AGM: India ramah VAR?

March 10-a AIFF Annual General Body Meeting (AGM)-in an sawi langsar tak chu Indian football-a video assistant referee (VAR) hman chungchang a ni a, hei hi AIFF president Kalyan Chaubey chuan vawi tam a lo sawi tawh.

AGM-ah hian 2025-26 season aṭanga ISL-a VAR hman turin an sawi a, chiang taka pawmna erawh a la awm lo. Sawi dan chuan AIFF lamin VAR hman vangin sum sen belh tur a nei lo, tih a ni a, mahse, hei erawh awih mai harsa tak a ni.

Chutihrual chuan chiang taka rel fel erawh a la awm lo a, May thlaa executive meeting neih leh huna ngaihtuah ṭhat atan dah a ni. Chaubey-a'n VAR hman chungchang a lo sawi fo tawh hi European top league hoa an hman ang VAR tak tak ni loin VAR lite a ni thung.

VAR lite ringawt hmang tur pawh hian, kum nga chhungin vaibelchhe 25-30 inkar vel sen ngai tura ngaih a ni a, AIFF hian sum a sen belh dawn lo anga sawi a nih avangin, ISL enkawltu FSDL lam sen tur niin a lang.

Chaubey-a'n VAR a sawi rik tirh khan, khatihlaia AIFF secretary general Dr. Shaji Prabhakaran chuan, "Sawi theih ka nei lo," tiin Vanglaini zawhna a lo chhang tawh a, sum sen belh tur ngaihtuah a, VAR hman duh lo zinga mi niin a lang.

BBC sports reporter leh commentator hlui Joe Morrison chuan, "Indian football hmasawnna tura inngai a nih chuan, tuifinriata tui mal far khat ang chauh hi a hlutna chu a ni. India rama VAR hman hian World Cup a hruai thlen phah dawn lo che u," tiin Vanglaini a lo hrilh tawh.

Itanagar-a AGM-ah hian AIFF chief refereeing officer Trevor Kettle chuan presentation pein, Indian football season kal mekah khelmuala referee thutlukna 85% chu a dik thu a sawi a, VAR lama hmingṭha agency panga nen inbiakna neih mek a nih thu a sawi bawk.

Chaubey chuan, "FIFA leh IFAB (International Football Association Board) hnenah ziakin kan duhna kan thlen bawk a, heng pawl pahnih aṭang hian pawmpuina lehkha kan dawng a nih chuan, hma kan la zui thei ang," a ti.

ISL-ah hian inkhel pakhat lak nan hian FSDL lam hian camera 12 vel zet an hmang sa a, I League lamah camera pali vel hman ṭhin a ni. ISL-a camera hman sa awm zat ngaihtuah hian, senso hi tlema hniam leh deuh tura ngaih a ni.

Buaina pakhat erawh India rama stadium kan hmante hi a ni. European football-a club langsarte angin Indian club-ten mahni pualin stadium puitling an la nei lo fur a, tuna ISL club 12 zinga club 11 stadium chu athletic tihna nena inṭawm a ni a, Mumbai City khelmual Mumbai Football Arena chu football chauh khelhna awmchhun a ni.

Chumi awmzia chu VAR bungrua bun leh ruahman a hautak dawn tihna a ni a, inkhelh zawh apianga VAR senghawi zel a ngaih dawn avangin a hautak dawn - angle tin aṭanga la tur camera a ngai a, athletic stadium a ni vek hian a tihautak.

VAR Lite-ah chuan angle tin hi hman a ni kher lo a, hei hi a tiawlsamtu pakhat erawh a ni. Chutihrual chuan athletic stadium vek, sorkar stadium hawh vek a nih miau avangin inkhelh zawh apiangin VAR senghawi a ṭul dawn a, India hian kan hman ṭantirhah chuan kan buaipui ve nak nak viau mai thei - thlir zel phawt ang!