Inter tan intuam dam hun

Champions League aṭanga tla hlim Inter Milan chuan Pathianni zan dar 1:15 hian match hautak an khel zui leh nghal dawn - Simone Inzaghi naute hian Serie A champion lai Napoli an lo mikhual dawn a ni.

UCL lamah an duh ang result an neih loh avangin Inter Milan hian thawh chhuah leh theihna remchang an dap ang, league hmahruaitu an nihna sawhngheh theihna remchang a ni dawn bawk, chutihrualin thil awlsam tak erawh a ni dawn lo.

Atletico Madrid hneh loa an tlak hnuah Inter manager Inzaghi chuan, "Ka naute hi lungngaia kun mai tur an ni lo. UCL match vawi riat kan khelhah hun pangngaia tlawm kan nei miah lo, chuvangin team ṭha kan ni tih a chiang.

"Hrehawm tia lungngaihna hun kan nei lo, tunah hian a rang thei ang bera thawhchhuah kan tum tur a ni ang," a ti. Napoli hi an hneh a nih chuan Serie A champion la ni chiah lo mah se, nomawi chawi turin an dinhmun a ṭha tawk tawh dawn hle a ni.