Man City 'treble champion' nawn beiseina a nung zel

Manchester City-in FA Cup nomawi humhim turin hmalam an pan zel a; March 16, Inrinni zan khan Newcastle United 2-0 in an hneh. Inhliam vanga Kevin de Bruyne tel loh zanah Bernardo Silva chu hero a ni a, Portuguese midfielder hian goal hnih a khung.

FA Cup quarterfinal inkhel dangah Coventry City-in injury time-ah Wolverhampton Wanderers 3-2 in an lethal a, Championship club-in semifinal an thleng. Nizan khan Chelsea leh Leiceter City bakah Manchester United leh Liverpool te an inkhel a, result kan hre hman lo.

City nge nge

Manchester City hi inelna lian pathum Champions League leh Premier League bakah FA Cup champion thei dinhmunah an ding vek. FA Cup quarterfinal-ah Newcastle mikhualin team ṭha bik an nihzia an lantir a, first half-ah ringawt 75% ball possession an nei.

Ball an chang tam ringawt lo a, goal an khung tel bawk. Minute 13-naah Bernardo Silva ball pet chu Newcastle defender-in dang perin goal-ah a kul lut a, goalkeeper Martin Dúbravka tan dan ngaihna a awm lo.

City chungnung mah se an khung danah an vannei a, goal hnihna pawh dan per tho a ni. Minute 31-naah Bernardo Silva-a'n box chhungah lalutin goal-ah a pet a, defender Sven Botman-a'n tauh zeuhin goalkeeper Dúbravka a dive sual.

Team ṭha zawk City-in an mualah goal hnih an khung hmasak avangin nuamsain an chak a tih theih a, chutihrualin inhliam Ederson aia lut goalkeeper Stefan Ortega-a'n ṭha zetin Alexander Isak-a goal khung tur a dansak.

City an hmuhnawm a, Phil Foden-a'n a thiam thil a lantir a, Newcastle tlarhnung tan Jeremy Doku a hnawksak a, goal hmaah Erling Haaland vanneih ṭum a ni lo. Second half-ah goal a luh belh tawh lo a, chak phu zawk City an chak.

Comeback ropui

Wolves-in an mual Molineux Stadium-ah Chamionship club Coventry City an chang a, Premier League club tan fixtures ṭha a ni. Mahse, goal hmaah Coventry an hlauhawm a, first half-ah goal a lut lo chungin mikhual team an che ṭha zawk.

Minute 53-naah Coventry-in an phu angin goal an khung a, Ellis Simms-a'n freekick aṭanga ball kal zel chu a su lut. Championship club an chungnung chhunzawm a, goalkeeper Jose Sa chet ṭhat zarah goal an chhuah belh lo.

Hun tawp lamah Wolves an rawn che ṭha a, Coventury tlarhnungin hna an nei ṭan. Minute 83-naah Coventry defender tihsual nang fuhtu Rayan Ait-Nouri-a'n kawh zetin a pet goal a, minute 88-naah Hugo Bueno a ball ṭha hmuh chu goal kilah tak a khung.

Wolves-in chak turah an inngai a, mah se injury time a la awm. Hun pek belh minute sarihnaah Simms-a'n siphurh sutna goal a tauh lut a, 2-2 a ni. Minute thum hnuah Haji Wright-a'n box chhungah rilru fim puin goal kilah a dah a, Coventry 3-2 in an chak.