LPS CUP: Sihphir Venghlun & Kawnpuiin final an hnaih

Mahindra XUV3OO LPS Cup pawh a hmawr bawk a hnai ta a, Sihphir Venghlun leh Kawnpui Jt. ten semifinal first leg-ah hnehna chang ve vein, an ke lehlamin final an rap tiin a sawi theih. Zirtawpni zan khan Sihphir hian 2-1 in Bethlehem Vengthlang an hneh a, Inrinni zanah Kawnpui chuan 2-0 in Vaivakawn an hneh bawk.

Zaninah semifinal second leg khelh a ni dawn a, zan dar 8:00-ah Sihphir Venghlunin Bethlehem Vengthlang an hmachhawn dawn a, an chungnunna hi si khat chauh a nih avangin BVT-in lehthal an tum ang - RG Stadium-a inkhelah veng mipui puihna a pawimawh dawn.

March 19, Thawhlehni zanah semifinal second leg hi khelh tur niin, Vaivakawn leh Kawnpui Jt. an intawng dawn a, Vaivakawn tan 'comeback' turin thapui thawh a ṭul dawn a ni.

Hei le Sihphir

Sihphir Venghlunin a vawi khat nan ADFA hnuaia inter-village football-ah final luh an tum a, an kalkawnga ding erawh kum 2016 champion BVT an nih avangin hmabak a hautak. Mahse, veng mipui ṭhahnem tak nena thawk chhuak BVT lakah thapui thawhin an bei a, goal an khung hmasa zawk.

Inkhel ṭantir lamah Sihphir tan Lalmuanpuia'n chance a nei nghal a, mahse, BVT defender Remlalfak'n goal line aṭangin a tauh chhuak. Mahse, first half hun pek belhah BVT keeper Malsawmsanga a chesual - Lalnunsanga ball vawrh luh, awlsam taka man tur nia lang chu a thlauh a, hei hi Muansanga'n su lutin, BVT-in tun inelnaa goal an chhuah hmasak ber a ni.

BVT an beidawng lo. Second half ṭan tirhah Sihphir centre back Ruatsanga'n ball a tauh sual a, BVT tan bench aṭanga luhtir Lalbiakmuana'n um lutin, goal-ah a chantir. Mahse, hetah hian a la tawp lo - hun pek belh minute thumnaah Malsawmtluanga inlarin, goal a khung a, 2-1 in Sihphir an chak.

Kawnpui an ṭha

Inelna ṭantir aṭangin Kawnpui ṭhatzia sawi a ni a, khelmualah an nemnghet. Aizawl district pawn aṭanga sawm bik team pali zinga mi Kawnpui hian Inrinni zan khan semifinal first leg-ah Vaivakawn chu 2-0 in an hneh a, inkhel an thunun hle - Vaivakawn tan final lut turin second leg-ah insiamṭhat hle a ngai ang.

Kawnpui tan Lalrintluanga chuan goal hnih a khung a, Vaivakawn lam hian a chhanletna tur an nei thei tlat lo - I League-a Aizawl FC hruai thlengtu coach K. Malsawmkima hoa inlan Kawnpui hian quarterfinal-ah 1-0 in champion lai Armed Veng an hneh a, semifinal thleng tur hian minute 90 chhungin an khingpui an hneh vek bawk!

Vaivakawn hi Mizo coach langsar Lalruatliana Sailo (Tawia) kaihhruai niin, quarterfinal-ah red card a hmuh avangin Tawia hian semifinal first leg-ah a team a ho thei lo - hei hian nghawng a nei niin a lang. Mahse, quarterfinal-ah khan he inelnaa vawi thum champion tawh Ramhlun South chu 2-1 in an hneh thei a, second leg-ah 'comeback' theih an beisei ang.