Mizoramin goal an surtir

Hockey India Senior Women National Championship 2024 khelh laiah Mizoram chuan nimin khan Rajasthan chu 20-2 in an sawp a, vawiin chawhma dar 10:30 hian an pool match hnuhnung ber atan Punjab an hmachhawn leh ang.

Nimin Major Dhyanchand Hockey Stadium, Pune-a inkhelah Mizoram tan Lalremsiami Hmar chuan goal ruk khungin player of the match atan thlan a ni a, goal nga khungtu PC Lalrinpuii a khel ṭha hle bawk.

Anni pahnih bakah hian Lalneihpuii (3 goals) leh Vanlalhriatpuii (2) ten goal khat aia tam an khung. Lalthantluangi, H. Lalruatfeli, Merabi Lalruatfeli leh Marina Lalramnghaki te chuan goal khat ṭheuh an khung bawk a ni.

Mizoram coach Lalroṭhuami chuan, "Kan naute hi hun rei tak chhung inkhel ho tawh lo, hmun hran hran ami koh khawm an ni a, inbuatsaihna hun a tepter bawk - ṭhenkhat laiah chuan han buai deuh map map lai kan nei pawh kha a mak lo.

"Mahse, vanneih thlak tak maiin an pool match hmasa pahnihah team nem kan hmachhawn a, chu chuan inrintawkna min siamsak. Kan hmabak Punjab erawh team ṭha tak an ni, chutihrualin hneh ngei tumin kan bei dawn," tiin Vanglaini a hrilh.

Mizoram hian an match hmasa zawkah Himachal chu 10-0 in an lo sawp tawh bawk, nizan khan Punjab leh Himachal inkhelin result erawh kan hre hman lo. Team pali aṭangin a sang ber an tlang dawn, quarterfinal lut chin chu National Games khel turin an tling nghal dawn a ni.