Zanin dar 7:00-ah Inter Kashi Vs Aizawl FC

Aizawl FC-in zanin dar 7:00 hian I League-ah Inter Kashi an hmachhawn dawn. Mizo club-in kuminah chak hmel an la hmu lo a, tun hnaia an khelh dan thlirin B. Malsawmzuala kaihhruai Aizawl FC tan point khat tal hlawhchhuah a pawimawh ang.

Mizo club hian match hnuhnung berah Gokulam Kerala 4-3 in an hneh lo a, chutihrualin minute 90 chhunga an khelh dan thlirin Aizawl FC hian theihna an nei tih a lang. Serchhip tlangval Lalrinzuala'n goal a khung chho leh tawh a, Aizawl FC tlarhma lamin goal khung hna an chhunzawm theih chuan tlarhnung tihphui chu hna pawimawh ber a ni ang.

Aizawl FC hian kuminah goal awm loin Mohammedan leh Rajasthan chelh ve bawk mah se inkhel dang pangaah goal 13 ngawt an chhuah. Sawmtea'n tlarhnung a siam ṭha thei lo a nih chuan mahni muala khel tur Inter Kashi lakah mualpho theih a ni ang. Edmund Lalrindika telna Inter Kashi hian kumin I League ringawtah goal 21 an khung tawh.