Real tan champion nomawi a hnai zel

Spanish La Liga-ah Real Madrid tan champion a hnai zel. Inrinni zan khan khualmualah Osasuna chu 4-2 in an hneh a, Real tan Vinicius Junior chuan goal hnih khungin, Dani Carvajal leh Brahim Diaz ten goal khat ve ve an khung ve bawk.

Real chak laiin pahnihna Girona chu Getafe khelmualah 1-0 in an tlawm thung. Real tan champion kawng zau taka hawnin a awm tihna a ni a, Girona aia an sanna hi point 10 lai a ni ta.

Mahse, Barcelona-in champion beiseina an la thlah bik lo tih hriat tel a ṭha a, Carlo Ancelotti naute tan inthlahdah zui nan chuan a la hma hret mai thei.

Nizan khan Barcelona hian Atletico Madrid an lenchilh a, result kan hre hman lo. Catalan club hian hnehna an chang a nih chuan pahnihnaah an chho ang a, mahse, Real an phak lohna erawh point riat a la ni dawn tho.

Vinícius a ṭha

Tun season-ah Real-in player thar Jude Bellingham an nei a, English midfielder hi Santiago Bernabeu-ah a tlangnel nghal avangin player langsar dang ho a hliahkhuh hneh hle - chung zingah chuan Vinicius a tel.

Mahse, Brazilian forward hi a ṭhat ngaiin a la ṭha reng a, hrem vanga inlan thei lo Bellingham awm loh laiin zo takin a mawhphurhna a hlen. Minute lina lekah goal hmahruai a khung a, minute 64-naah a belhchhah bawk.

Vinicius-a goal khung karah hian goal thum erawh a lut hman. Goal hmahruai a khung aṭanga minute thumna lekah Osasuna tan Ante Budimir chuan si phurh a sut a, mahse, Real tan Carvajal-a'n khung ve lehin, 2-1 in first half a tawp.

Bellingham awm loh vanga bul ṭan Brahim Diaz chuan minute 61-naah an goal thumna a khung a, Vinicius hian minute 64-naah a belhchhah ve leh bawk - Osasuna tan hun pek belha Iker Munoz goal khung chu scoreline cheimawina chauh a ni.

Real vanneihna

Madrid boss Carlo Ancelotti-a'n a vawi 200 nan Real Madrid a chakpui a, champion an hnaih zel bawk. King Carlo tana lawmawm chu hun pawimawhah a player-te an zuai ve ngai lo hi a ni a, player chhawr theih loh a neih pawhin zo takin mi dangin an thlak zel.

Bellingham awm loh vanga inlan Brahim Diaz hian khelmualah minute 90 hun hman nei tam lo mah se, tun season-a match 33 a khelh aṭangin goal kua a khung a, assist vawi li a nei bawk.

Vinicius hian tun season inelna hrang hrangah match 28 khelin goal 18 ngawt a khung ta a, assist vawi riat a tel. Ancelotti nauten champion nomawi chawi an duh a nih chuan Vinicius chet ṭhat hi a pawimawh zel ang.

Federico Valverde lam hmaih a thiang lo. Real goal khung pali zinga goal thum chu a siamsak a ni a, Uruguayan midfielder hian tun season-a league match 29 an khelhah vawi sarih zet assist a nei tawh.

Girona an tlawm

Real champion theihna turin engkim a thleng emaw tih mai tur a ni a, Osasuna an hneh hnu lawkah anmahni hnaih bertu Girona inlan ve lehin, khualmualah Getafe chu 1-0 in an ngam lo - champion a hla ta viau.

Getafe hian minute 33-naah Jesus Santiago hmangin goal an khung a, goal dang a lut tawh lo. Girona hian February 10-a Real Madrid an hmachhawn hma khan league match 23-ah vawi khat chiah tlawm an nei a, an ngam loh chu Real an ni.

February-a an intawn hian Real an ngam lo nawn a, 4-0 ngawtin an tlawm. Real laka an tlawm hmasakah an tho leh a, tunah erawh an tho hleithei ta lo. Ancelotti naute laka an tlawm hnu hian league match nga khel leh tawhin, vawi thum an tlawm a, vawi hnih chiah an chak.

Segunda division lama Rayo Vallecano leh Huesca lo champion pui tawhtu coach Míchel tan Girona champion pui tum ai chuan, season thara Champions League khelh phak tum mai chu thil finthlak zawk a ni tawh ang - hetihlai hian Champions League khelh tum Athletic Bilbao chuan Gorka Guruzeta-a goal hnih hmangin Alaves chu 2-0 in an hneh ve bawk.