Goal khung tura piang Harry Kane

Harry Kane chuan Bundesliga record thar a siam der! German football inelna sang berah hian, season hman hmasak bera goal 31 khung tling thei hmasa ber a ni - match khelh hmabak pakua a la nei hial bawk.

Inrinni zan Bundesliga inkhelah Bayern Munich chuan Darmstadt 5-2 in a sawp. Jamal Musiala-a'n goal hnih a khung bakah Kane, Serge Gnarby leh Mathys Tel ten goal khat ṭheuh an khung bawk a ni.

Kane-a leh record

Mualneitu Darmstadt lamin mawi taka Bayern tlarhnung an ṭhiah hnuah Tim Skarke hmangin goal hmahruai an khung a, mahse an goal neih hmasak hi German champion Bayern Munich chhaih kawlhna maiah a chang.

Box chhungah Kane chuan Musiala tan lo dan persakin - German player hian si phurhna chu hnai zet aṭangin a khung. England captain hun a thleng zui, awmna hmun dik takah lo awm dik leh chatin chawlhlawk hmain an goal hnihna a tauh lut.

Second half chu Bavarians lam chan a ni zui a, a khat mawi tawkin Musiala, Gnarby leh Mathys Tel ten an inkhung chhawk, hun tawp dawna Oscar Vilhelmsson goal khungin an mualpho lutuk tur a hliahkhuh zo tawh lo.

Tottenham striker hlui Kane-a'n season khata league goal a khung hnem ber chu Premier League goal 30 a ni a, a mimal record season khat chhunga league goal khung hnem hi a khum chiah bawk a, a belhchhah ngeiin a rinawm.

Kane a hliam?

Minute 82-naah Kane hi thlak a ni, goal banah a kerek a tauh avangin a khel zui thei lo. Spurs tana a khelh lai pawhin Kane hi a kerek a lo hliam zeuh zeuh tawh, engtiang taka na nge a nih erawh sawi theih a la ni lo thung.

Bayern Munich manager Thomas Tuchel chuan, "Harry hi chuan goal khung tura hun a la awm a nih phawt chuan khelmual chhuahsan hi a duh ngai lo, inkhel tawp hmaa a chhuah a ngai kha pawi ka ti hle," tiin tun season inelna hrang hrang match 35 aṭanga goal 37 khungtu chungchang a sawi.

International break a awm zui dawn a, striker ṭha Kane hi England tan koh a ni - nimin tlai thleng kha chuan Three Lions squad aṭanga a inhnuhdawh thu hi hriat a la ni lo, a kerek hliam dinhmun hi endik leh hmasak phawt a ni ang.

April thlatirah Kane hi North London lamah a kir leh dawn - Arsenal nen Emirates Stadium-ah Champions League quarterfinal first leg an khel dawn; Kane tan Gunners khelmual hi thil thar a ni dawn lo - goal a khung tawhna hmun a ni.