Fulham lakah Tottenham mualpho

Tottenham Hotspur chuan Premier League table-a palina nih lailawk theihna remchang an neih chu an bawhpelh - Spurs hian beiseina sang tak nen Fulham tlawh mah se 3-0 in an zawr.

Inrinni zan inkhelah mualneitu Fulham tan Muniz Carvalho-a'n goal hnih a khung inkar lakah Sasa Lukic chuan goal khat a lo thawh ve bawk a, mikhual team lamin a chhanletna tur an nei ve lo.

Ange Postecoglou enkawl Spurs hian an match hnuhnungah Crystal Palace leh Aston Villa an hneh a, inrintawkna pawh an nei sang. Mahse, ni dang angin James Maddison leh Son Heung-min te an hriam tawk lo, goal thum chauh an chhuah chu an vannei zawk.

Hnehna chang ni se la chuan Tottenham hian Villa lehpelin palina dinhmun an luah ang, mahse an hun ṭha an hman ṭangkai loh avangin panganaah an awm zui a, nizana inlan Villa an chak a nih phei chuan Unai Emery naute an kal fal ang.

Tottenham captain Son-a chuan, "Kan khelh dan kha pawmzam theih a ni lo, midang chauh pawh ni loin kei ngei pawh ka khel chhe hle. Inenfiah kan ngai vek a, kan tihsual ṭheuh a ni tih pawh kan pawm thiam a ngai bawk.

"Season harsa pangngai tak mai kan hmang a, kan thawhchhuah mek laia khatiang tak maia kan khel kha a zia lo hle. Tun match kan chak lohna hi mitinin harh thar nan kan hman a ngai," tiin a sawi.