Group khatah Mizoram leh Manipur

3rd NorthEast Games 2024 football inelnaah Mizoram chu Manipur nen group khatah an awm a, Assam leh Sikkim te an awm tel bawk. Group khat aṭangin a sang pahnihin semifinal an lut ang.

Group A-ah inelna thlengtu Nagaland bakah Meghalaya, Tripura leh Arunachal Pradesh te an awm a, football inelna hi March 19, Thawhlehni aṭangin NAPTC, Chumoukedima-ah khelh ṭan tur a ni.

Mizoram Football Association-in MPL10 champion Mizoram Police behchhanin team a din a, coach Lalbiaksanga Colney-in a ho a, Police player-ten hmun pawimawh an chang. Mizoram hian match hmasa berah Manipur an hmachhawn nghal dawn a; March 19, Thawhlehni dar 1:00-ah an inhmachhawn ang.

Manipur zawh hian Mizoramin Assam (March 20 - 11:00 AM) leh Sikkim (March 21 - 9:00 AM) te an hmachhawn leh dawn. Semifinal hi March 22, Ningania khelh tur a ni a, final hi March 23, Inrinnia khelh tur a ni.