North East Olympic Games 2024 : Mizoram aiawh turten Nagaland an pan

3rd North East Olympic Games 2024 chu Nagaland-ah March 18-23, 2024 chhungin khelh a ni dawn. Mizoram aiawh turte hian nimin leh March 16, Inrinni khan Ṭhuampui Bus Terminal aṭangin inelna neihna hmun tur Nagaland panin Aizawl an chhuahsan.

Mizoram hian Mizoram Olympic Association (MOA) kaihhruaina hnuaiah Sports Association hrang hrang 14 aṭangin infiammi 181 an tir a; BCCI-in phalna a pek theih loh avangin cricket inelna erawh a tel dawn lo.

Opening Ceremony hi zanin dar 7:00-ah neih a ni dawn. Mizoram Chef de Mission hi Lallianṭhuama (Sentea) a ni a, ani hi MOA Vice President a ni. Deputy CDM-ah Joseph Thansanga (MOA Joint Secretary) leh Lalduhkima Sailo (USAM General Secretary) te an awm.

NE Olympic hmasa ber kha kum 2018 khan Manipur-in an thleng a, Mizoram hi palinaah awmin G-8, S-15, B-29 an la. Kum 2022-a Meghalaya-in 2nd NE Olympic an thlen ṭum khan Mizoram hi paruknaah an awm a; G-15, S-26 leh B-52 an la a, Mizoram hnuaiah hian Tripura leh Sikkim chauh an awm a ni.