Xavi-a'n Barca a hnar chhan a sawi

Barcelona legend Xavi chuan a club hluiin an team enkawl tura an sawmna a hnar chhan a sawifiah a, Catalan club enkawl chu atan a la hma mah mah nia a hriat thu a sawi. 

Spain international hlui hian May thla khan inkhelh a chawlhsan a, coaching lamah hun hmang zuiin a career tawp hmanna Al Sadd a enkawl. Barcelona hian an coach Ernesto Valverde an ban hnuah Xavi lam hi an hawi chat a, mahse player a nih laia Barcelona tana nomawi chawi theih zawng zawng chawitu hian Qatari club Al Sadd enkawl chhunzawm a thlang. 

Xavi sawi danin Barca hian Valverde an ban hma aṭangin Barcelona chief executive Oscar Grau leh sporting director Eric Abidal te chuan Xavi hi an be lawk a, mahse Spanish midfielder hmuhnawm tak ni ṭhin hian a hnar.  

Kum 39 mi Xavi chuan, "Min sawmna hi ka lo hnar a, dik taka sawi chuan ka tan a la hma hret a ni," a ti a, khawvela club ropui ber pawl enkawl turin tawnhriat a la ngah tawk loah a inngai. 

Barcelona tana match 750 kheltu midfielder chuan, "Engtikniah emaw chuan Barcelona enkawl ngei hi chu ka duh a ni," a ti a, tunah hnar mah se 1998-2015 inkara a lo khelh tawhna club coach la nih ngei a duh. Catalan club hian Xavi an chan tak lohah chuan Real Betis boss hlui Quique Setien an lalut a, Xavi chuan coach thar chu, "A hnathawh dan hi ka duh zawng tak a ni a, Barca-ah a hlawhtlin ngei ka beisei," a ti. 

Barcelona hian coach hial ban mah se La Liga-ah erawh hmahruaitu an la ni reng a, Setien hnuaia an match hmasa ber chu Pathianni zanah khelin Granada an mikhual dawn a ni.  Goal difference hmang chauha Barca thlautu Real Madrid chuan zanin dar 8:30-ah Sevilla an mikhual dawn a, Atletico Madrid-in zanin dar 1:30-ah Eibar an lenchilh thung ang.