Liverpool quadruple beiseina titawptu Man United

Jurgen Klopp-a thlah nan Liverpool-in season duhthusam hman an tum a, English club la tih ngai loh nomawi lian pali chawi an tum. Mahse maw, Reds beiseina chu Erik ten Hag-a kaihhruai Manchester United-in suangtuahna lekah an chantir.

Pathianni zan khan Old Trafford-ah ennawm hmuhnawm chhuah a ni a, FA Cup quarterfinal-ah Man United leh Liverpool te an inhmachhawn. Minute 120 khelh a ni a, goal sarih zet a lut a, a tawpah Man United 4-3 in an chak. FA Cup-a Liverpool nomawi beiseina a tawp nghal. Klopp-a'n Anfield-a kum kua a cham chhungin FA Cup nomawi vawi khat chauh a chawi a, German manager record hi Erik Ten Hag-a'n season hnih chhung lekin nih rual a tum ang.

Manchester United-in tun season-ah nomawi beiseina an nei chhunzawm a, semifinal-ah Championship club Coventry City an hmachhawn dawn avangin final kalkawng harsa tur niin a lang lo. Nomawi chawi erawh a la harsa tho dawn - semifinal pakhat zawkah champion lai Manchester City leh Chelsea te an inkhel ang.

United ṭha mi

Liverpool-in tlarhmaah Mohamed Salah, Luis Díaz leh Darwin Núñez te an tlar thei tawh a, player naupang zawk chhawr chunga League Cup chawi thei Reds-in Old Trafford luhchhuah ngei an tum.

Man United-in inkhel pawimawhah inhliam vangin Casemiro chhawr thei lo mah se Rasmus Hojlund an chhawr thei a, Aaron Wan-Bissaka pawh a dam. English right back Wan-Bissaka hi vei lamah chhawr a ni thung.

Old Trafford-a inkhel a ni bawk a, United-in nung takin bul an ṭan. Kobbie Mainoo thiamzia hnai taka hmutu chu Liverpool player-te an ni a, Ten Hag-a hoten an khelh ṭhat rah sengin goal pawh an khung hma.

Minute 10-na lekah Marcus Rashford leh Alejandro Garnacho te thawhrah sengin Scott McTominay-a'n goal hmahruai a khung. Man United hian goal dang khungna hun ṭha pawh an nei a, Scottish midfielder McTominay-a'n chance ṭha bik a hlah.

Liverpool hun

Jurgen Klopp-a kaihhruai Liverpool chu goal khat lekah an beidawng ngai lo, first half chanve chhoah inkhel an thunun a, Man United-in an chhaih kawlh ta emaw tih mai tur a ni. Salah-a khelh ṭhat ber zan ni lo mah se goal hmaah erawh a hlauhawm reng.

Reds-in minute 39-naah Endo hmangin si phurh sutah an inngai a, VAR hmanga ennawn hnuah ball petu Salah a offside. Man United-in insiamṭhat nan an hmang lo a, tlarhnung a phui phah lo. Minute 44-naah Alexis Mac Allister-a'n box pawn chiahah hun thawl a nei a, Mainoo-a'n a dan per avangin goalkeeper Andre Onana-a'n a dang thei lo.

First half-ah vek Reds-in goal an khung belh. Bruno Fernandes-a'n mual sirah ball a hloh ho hret a, ball chhuhsaktu Joe Gomez cross chu Diaz-a'n changin Darwin Nunez a pe leh a; Uruguayan striker hian goal-ah kawh zetin a pet a, keeper Onana-a'n dang mah se a per chu Salah-a'n chang fuhin goal-ah kawh zetin a pet goal. First half-ah United-in bul an ṭan ṭha a, Liverpool-in a tawp an khar ṭha.

Liverpool hian second half hun tam zawk pawh an thunun zui a, Man United an ṭang thei tawh lo a ni ber. Kar laihawlah Sparta Prague an sawp ṭumin Salah leh Dominik Szoboszlai te a chhawr hnem hret a, Klopp-a'n chak tawhah a inngai a ni ang, Salah leh Szoboszlai bakah Andrew Robertson te hahdamna hun pein a la chhuak!

Antony, Rashford, Amad

Man United-in goal beiseiin attacking player Antony, Amad Diallo leh Christian Eriksen te an luhtir ve thung. Man tam satliaha mi ṭhahnem takin an ngaih Antony a rawn inlar a, minute 87-naah Brazilian forward hian box chhungah ball changin rang taka inherin goal kilah a pet lut.

Inkhel kalhmang a inthlak hlawk. Man United forward Rashford-a'n hun tawp hma hretin box chhungah ball ṭha zetin a la thla a, a hun ṭha neih chu goal pawnah chiah a pet. Ten Hag-a hoten siphurh sut tlai mah se Rashford a chance ṭha bik vangin minute 90 chhungin chakna chance an nei ṭha zawk.

Extra time khelh a ni a, first half tawp hma chiahin Harvey Elliot-a'n box pawn aṭangin goal-ah a pet a, Christian Eriksen ke perin goal-ah a lut. Liverpool dinhmun a ṭha leh ta zawk. Mahse, Reds tlarhnung an fimkhur tawk lo a, Klopp-a hote tihsual hrem thei tur khawpin Man United player-te an thiam ve bawk.

Minute 112-naah McTominay ball pek chu Rashford-a'n vawi khatah pet nghalin goal kilah tak a pet a, Liverpool keeper Caoimhin Kelleher tan a goal lai thlir mai loh chu tih theih a awm lo. Reds-in penalty shootout ngai loin chak an tum a, corner kick hman ṭangkai an tum.

Mahse, Man United-in corner kick hi a vuak let nan an hmang. Garnacho-a'n chak taka ball la chhuakin thui tak a khalh a, amah thlawptu Amad Diallo pein Ivorian forward hian extra time-ah pawh injury time-ah chakna goal a khung. Amad hian lawm vangin kawr a phelh a, yellow card a hmu tawh tih a theihnghilh. Ivorian forward hi fimkhur loh vangin hnawhchhuah a ni a, hun pawimawh laiin red card hmu mah se Liverpool laka chakna goal khungtu a nih avangin United ṭantute tan chuan 'hero' a ni.

Man United-in player 10-in khel chhunzawm mah se Liverpool tan si phurh sutna hun a awm tawh lo. Ten Hag-a hoten FA Cup history-a inkhel hmuhnawm bikah an hmelma Liverpool 4-3 in an hneh. FA Cup-ah Man United-in Liverpool hi vawi 11 zet an pet tla tawh a, FA Cup-a an hneh ngun ber an ni.

Old Trafford-ah Man United tan lawmna a thleng a, an hmelma Reds an hneh avanga lawmna a ni ringawt lo - beiseina thar an neih avanga lawmna a ni tel. Mainoo, Garnacho, Antony, Rashford, Amad, Hojlund leh Dalot ten theihna sang an lantir a, khelmual chhunga McTominay inpekna sang tak chu chakpui tham a tling. Ten Hag-a season ṭhat loh ṭumah FA Cup nomawi a beisei ngam a, season thara UCL khel turin kawng zau tak a la inhawng bawk.