Mizo nulaten Punjab an hneh
Mizoram chuan 14th Hockey India Senior Women National Championship 2024 khelh laiah quarterfinal an lut. Nimin khan Mizo nulate hian an pool match hnuhnung berah Punjab an hneh a, pool match pathumah chak fai vekin an tlang.
Tournament khelh laiah Mizoram hian quarterfinal an lut a ni satliah lo. India ram huap infiamna khawmpui lian National Games neih leh tur atan an tling nghal bawk, hlawhtlinna chi hnih an hlawh chhuak tihna a ni.
Major Dhyanchand Hockey Stadium Pimpri, Pune-a inkhelah Mizoram tan PC Lalhrinpuii'n goal hnih a khung bakah H. Lalruatfeli leh Marina Lalramnghaki te chuan goal khat ve ve an khung bawk - Lalhlunmawii chu player of the match ni khawpin a khel ṭha.
Mizoram hian inkhel bul an ṭan fuh hle - Lalrinpuii chuan minute 10 tlin hmain goal hnih a khung hman der a, inkhel an thunun chhunzawm bawk. Penalty corner aṭanga goal khung zuiin si thum faiin hma an hruai. Punjab lamin a hnuah nawr buai ve deuhin goal hnih nei mah se goal khat an belh ve leh a ni.
Goal li an khung a ni satliah lo a, Mizoram team hian India team tana penalty corner-a player hlauhawm bera chhal ngam Gurgeet Kaur pawh che thei loin an siam, a dang tura ruat Lalremsiami Hmar chuan a hna a tlin hle.
Mizoram coach Lalroṭhuami (Bte-i) chuan, "Mizoram team ten quarterfinal hial kan thleng thei hi a makin a lawmawm a, kan khelh hmabakah pawh Mizoram tan theihtawp kan chhuah zel dawn a ni," tiin Vanglaini a hrilh - Mizo mipuite chu ṭawngṭaipui turin a sawm bawk.
Mizoram player zawng zawng bakah coach Lalroṭhuami leh assistant coach Rosalind Lalchhanhimi Ralte te hi Thenzawl SAI Hockey Training Center aṭanga inzir chhuak vek an ni, tualchhunga chher chhuah hlang an ni.
Bte-i chuan, "Hockey Mizoram leh SYS ten player leh coach tan remchang min siamsak a, a hmunah hian Pune Mizo Welfare ten min ṭawiawm ṭha em em bawk," tiin lawmthu a sawi a, an thlen chin aṭanga hmasawn zel an tum thu a sawi bawk.
March 20, Nilaini zan dar 6:00 hian Mizoramin quarterfinal an khel zui leh dawn a, team ṭha Jharkhand an hmachhawn leh ang. Inkhel hi FanCode website leh app-ah live-in pekchhuah ṭhin a ni.