Thawhlehna beiseitu Vaivakawn an tho ang em?

Mahindra XUV3OO LPS Cup semifinal second leg-ah zanin dar 8:00 hian Vaivakawn leh Kawnpui Joint an inhmachhawn dawn a, first leg-ah Kawnpui hi 2-0 a an lo chak tawh avangin Vaivakawn tan final thleng turin thih tha nena beih a ngai dawn.

RG Stadium, Mualpuia team pahnih inkhelh hmasa zawkah Kawnpuiin inkhel an thunun a, kawng tinrengah Vaivakawnin an tluk lo ti ila, thu uar lutuk kan ni lo ang - Vaivakawn vanneihna erawh second leg a la awm hi a ni.

Team pahnih intawn hmasaka an chak loh chhanah Vaivakawn hian chhuanlam tur an nei bawk - coach Lalruatliana Sailo (Tawia) chuan hrem vangin khelmual sirah a naute a ho thei lo a, mahse, zaninah chuan AFC A licence neitu Tawia hoin Vaivakawn an inlan dawn - quarterfinal aṭanga team ṭha Ramhlun South meuh pet chhuak thei team hian Kawnpui lakah 'comeback' theih an inbeisei ang.

Vaivakawn tan 'comeback' tur erawhin thawhhona ṭha a pawimawh a, khelmual chhunga player thawhhona piahlamah, veng mipui puihna a pawimawh - Aizawl khaw chhung team hian hun harsaah puitu fans an neih tam chuan an beisei ang result hmuh theihna chance a sang.

Chutihrual chuan tlarhnungah captain David Lalrinpuia (India international Apuia u) hoin an khawng ṭhat a ṭul a, Kawnpui nen an inkhelh hmasaka nil, goal nga thun tawh Benjamin Lalnunpuia leh Lunglei Ramthar aṭanga an lak, goal li khung tawh Lalthanzuala ten an hna an thawh a ṭul bawk.

Vaivakawn tan an beisei ang result hlawhchhuah mai erawh a awlsam dawn lo. Kawnpui hi Mizo coach zinga tawnhriat nei ṭha ber pawl K. Malsawmkima enkawl an ni a, Aizawl FC coach hlui hoin champion nomawi aia hniamah lungawi an tum lo.

Kawnpui hian semifinal thleng turin minute 90 aia tam vawi khat mah an mamawh lo a, penalty pet ngai loin an khingpui an hneh chho zel. Hei hian team ṭha an nihzia a pholang.

Aizawl district pawn aṭanga sawm bik team zinga mi Kawnpui hi an match hmasa bera an bye hnuah, last 32-ah Ramhlun Sports Complex chu 4-1 in an sawp a, round of 16-ah nikum YMA football-a semifinalist, champion beisei ngam Salem Veng chu 3-1 in an hneh thei - quarterfinal-a an hneh pawh tualchhung football-a hming langsar Armed Veng an ni.

Kawnpui hi Aizawl FC forward hlui Albert Zohmingmawia'n a la ho thei a, Lawngtlai aṭanga an lak, goal nga khung tawh Lalkrossmawia, Churachandpur tlangval Jehova Lalthangsanga leh Hnahthial tlangval Lalrintluanga te an rintlak bawk avangin an ṭha hle - zaninah inkhel hmuhnawm beisei rawh.