Foxes hnehtu Chelsea an tlang

Chelsea chuan hun tawp dawnah goal hnih khungin Leicester City chu 4-2 in an hneh a, harsa takin FA Cup semifinal an inhlangkai - Manchester City nen final luh an inchuh leh ang.

Stamford Bridge-ah Blues an che fuh hmasa, Nicolas Jackson-a thawhrah sengtu Marc Cucurella-a'n vengtu a nei lo a, nuamsa takin goal hmahruai a khung, a hnuah Raheem Sterling chuan ama penalty hlawhchhuah a hlah.

England tana koh loh Sterling hian ṭha taka ball la lutin Cole Palmer tan a siamsak a, chawlhlawk laiin Mauricio Pochettino nauten si hnih faia hma an hruai avangin tlang chiang tura ngaih an ni.

Mahse, second half tir lamah Axel Disasi-a'n yard 35-a hla aṭangin a back pass vak mai a, an goalkeeper Robert Sanchez awm lohna zawnah a ni si, ui tak chungin an lam goal lut lai an thlir.

Leicester City an phur thar - forward Stephy Mavididi chuan box chhungah ṭha taka ball la lutin goal kilah tak a khung a, si phurh an sut zo der, chak lo chiang tawha ngaih khan tho chhuak turin beiseina an nei thar.

Amaherawhchu, minute 73-naah Foxes defender Callum Doyle chuan hnung lam aṭangin Jackson a titlu a, penalty chawi chiah lo mah se hnawhchhuah a ni, khualmualah a kim lo zawk ni chunga an khelh chhunzawm a ngai.

Championship club hian hun engemaw ti chhung chu Chelsea an dang chhunzawm thei, mahse hun tawp dawn tak takah substitute pahnih Carney Chukwuemeka leh Noni Madueke ten goal khungin London club an vannei ta zawk.

Chelsea coach Mauricio Pochettino-a'n minute 78-naah Sterling ni loin Mykhailo Mudryk zawk a la chhuak, hetih lai hian Blues ṭantu tam tak chuan an lo au el a, an coach hi 'i thil tih i hre lo a ni' tiin a rualin an au - Sterling zawk chhuak turin an duh.

Pochettino chuan, "Hetiang boruak hi chu kan pawm thiam a ngai. Squad chhung boruak te, fans boruak leh thil dang zawng zawng hi sawifiah vek sen a ni lo, a nihna anga pawm thiam chin ka neih a pawimawh hle.

"Tunah hian min ṭantute hlimna thlen ngei tumin theihtawp kan chhuah mek a ni a, fans lam pawhin chu chu an pawm ve a ngai. Tawp chin nei loin min thlawp ṭhin, match lehpekah chuan boruak ṭha bawk kan neih leh ka besei," a ti.

Fans lamin Sterling an sawisel chhan pakhat chu, penalty pettu pangngai Palmer hnen aṭangin ball a laksak a, penalty hi a hlah zui. Poch chuan, "Penalty pet kha a dil, player-te thutlukna kan zahsak tur a ni ang.

"Sterling hi kan thlawp tlat zawk tur a ni. Premier League-ah kum 10 chuang tawnhriat a nei tawh, kan tana a hnathawh tawhte pawh kan zahsak tur a ni," tiin a player a chhan. Fans lamin coach thusawi hi an pawm em, tih erawh hunin a la hril dawn a ni.