Tlai dar 1:00-ah Mizoram Vs Manipur

3rd NE Olympic Games football inelnaah vawiin chawhma dar 1:00-ah Mizoram leh Manipur te NAPTC, Chumoukedima-ah an inkhel dawn.

Mizoram hi champion lai ni mah se inelna hnuhnung berah kha chuan kum bithliah inelna a ni a, kuminah chuan senior team inelna a ni tawh.

Mizoram hi Manipur bakah Assam leh Sikkim te nen group khatah an awm a, a sang pahnihin semifinal an lut dawn.

Manipur leh Mizoram hi Santosh Trophy final round neih zawh takah semifinal-ah an tla ve ve a, mahse group stage-ah Manipur hian 4-1 in Mizoram lakah hnehna an chang.

Santosh Trophy-ah player 22 a hruai theih laiin NE Olympic-ah player 18 chiah a hruai theih. Manipur hian player ngai bawk an hruai niin a lang.

Mizoram erawh Police player paruk an kal nawn tih loh chu player thar vek an ni dawn. Lalbiaksanga Colney kaihhruai Mizoram hian nimin khan inelna neihna tur hmun Nagaland an thleng chauh a, hahdamna hun ṭha an nei dawn lo.

NE Olympic Games-a Mizoram team hi Mizoram Police behchhana din an nih avangin training-na hun ṭha nei lo mah se MPL10 champion an nih bakah All India Police Meet khelh tuma rei tak an inpuahchah avangin player-te an inhrechiang sa. Coach BS-a leh a hoten Nagaland-ah Manipur hneh ngei an tum dawn a ni.