Medvedev hnehin Alcaraz champion

Carlos Alcaraz chuan player chhuak thar ho zingah a ṭha bik a nihzia a takin a lantir leh ta. Pathianni zanlaia khelh zawh tak Indian Wells-ah Daniil Medvedev hnehin a champion.

World number 2 Alcaraz hian Russian star Medvedev hi 7-6 (7-5), 6-1 in a hneh. Grand Slam dawta inelna ngaihhlut ATP Masters 1000 a kawl lai a humhim bakah, nikum July thlaa a lak Wimbledon hnua nomawi a chawi lehna hmasa a ni bawk.

Thla hmasa khan Rio Open-ah Alcaraz hi a inlan a, mahse kerek hliam vangin a inhnukdawk. California thlalerah hian title humhim ngei tumin a feh chhuak, a duh leh tum ang a tihlawhtling thei ta a ni.

Spanish tlangval Alcaraz chuan, "A hma lama ka sawi tawh ang khan Indian Wells hi chu ka tan a nuam. A bik takin kumin hi a nuam zual, ṭha takin ka khel thei dawn em, tih pawh kha a chiang lo reng, chutiang chunga champion chu a hlu zual hle," tiin a sawi.

Alcaraz hian final kalkawngah player ṭha Alexander Zverev a hneh a, tun hnaia world number 2 a nihna rawn chuh buai phak Jannik Sinner a hneh thei bawk, a tan tournament ṭha leh hriatreng tur a ni ngei ang.