Champion tum Leverkusen an kal zel

Kum 11 hnua Bundesliga champion thar min hmuhtir tumin Bayer Leverkusen an kal zel - Pathianni zan khan SC Freiburg chu khualmualah 3-2 in an hneh a, tun season-a inelna hrang hrangah Leverkusen hi an la tlawm miah lo!

Freiburg khelmualah Leverkusen hian goal khung turin an nghah rei a ngai lo. Second 85-na lekah Florian Wirtz chuan mawi lutukin goal a khung a, 1-0 in hma an hruai der.

Europa League round of 16 aṭanga tla hlim Freiburg hian rei erawh si an phur lo. Minute 10-naah chance an nei ve nghal a, Japanese winger Ritsu Dōan chuan mawi zeta ball a lakluh hnuah si phurh sutna goal a khung.

Mahse, Leverkusen chhaih kawlhna mai a ni. Minute 40-naah Freiburg goalkeeper Noah Atubolu a chesual a, a chetsual nangchingtu Adam Hlozek chuan Leverkusen goal hnihna khung nan a hmang a, 2-1 in chawlhkawk an hmang.

Second half-ah pawh Leverkusen an reh rei lo. Europa League round of 16 aṭanga Qarabag an petchhuah ṭuma hun pek belha goal hnih khungtu Patrik Schick a inlar a, an goal thumna a khung.

Mahse, Xabi Alonso naute hi awlsam takin an chak bik lo. Minute 79-naah bench aṭanga luhtir Yannik Keitel chuan Freiburg tan a khung ve leh a, 2-3 a ni - mualneitu team hian an beisei angin goal dang erawh an nei zui lawk thei lo a, 3-2 in an mikhual lakah an tlawm.

Leverkusen hian tun season-a league match 26 an khelhah vawi 22 ngawt hnehna an chang ta a, vawi li an khingpui inhnehtawkpuiin, tlawm an nei miah lo. Anmahni hnaih bertu Bayern Munich aiin point 10-in an sang mek a, league match riat chiah khelh tur a awm tawh avangin an tan champion a hnai ta hle.

Pathianni zan Bundesliga inkhel dangah Borussia Dortmund chuan 3-1 in Eintracht Frankfurt an hneh a, season thara Champions League khelh ngei an tumna chu an chhem nung ve zel.

Mikhual Frankfurt tan hian Mario Götze chuan minute 13-na lekah goal hmahruai khungin, a club hlui lakah zahngaihna a lantir lo. Mahse, Dortmund hian first half-ah Karim Adeyemi hmangin an chhanglet nghal a, 1-1 a ni.

Second half-ah goal dang a lut lawk lo a, mahse, minute 80 hnu lamah Dortmund-in an dinhmun an chingfel. Mats Hummels chuan minute 81-naah hmahruaina goal a khung a, hun pek belh minute thumnaah Emre Can chuan penalty aṭangin chak a nemnghet bawk.

Dortmund hian point 50 hmuin, league table-ah palina dinhmun an luah mek a, mahse, an hnuai chiaha awm RB Leipzig hian khelh zat inangah point 49 an neih avangin Dortmund tan tha thlah loa khelh chhunzawm zel a ṭul.