Table chung bera kir tum Leeds

Championship table chung berah Leeds United an awm a, Pathianni zan khan Millwall chu 2-0 in an hneh. Season hmasa lawka Premier League aṭanga relegate team hian English top flight league-ah kir lehnghal an tumruh hle.

Elland Road-a inkhelah hian Leeds tan Wilfried Gnonto chuan minute 33-naah mawi lutukin goal hmahruai a khung a, bench aṭanga luhtir Dan James chuan minute 79-naah a belhchhah bawk - goal hnih hi French attacking midfielder Georginio Rutter-a siamsak ve ve a ni.

Premier League-a vawi hnih ngawt Norwich City lo hruai thleng tawhtu Daniel Farke enkawlna hnuaiah Leeds hian season thara Premier League khelh an beisei mek a, Championship match 38-ah vawi 25 chakin, vawi sarih draw leh vawi ruk tlawm an nei a, point 82 hmuin table chung ber an luah.

Mahse, Leeds tan tha thlah a thiang lo - pahnihna Leicester City hian point 82 tho an nei a, anni aiin match khatin an khel tlem bawk. Pathumna Ipswich Town hian point khat chiahin Leeds hi an phak lo a, Premier League khelh phak tum inchuh boruak a ngaihnawm zel dawn.